കണ്ണെടുക്കാൻ ആകില്ലല്ലോ

കല്യാണത്തിരക്കുകൾ ആരംഭിക്കും മുൻപേ എന്നും തിളങ്ങാനുള്ള ഒരുക്കങ്ങൾക്കു തുടക്കമിടാം

- അമ്മു ജൊവാസ്

കല്യാണം തീരുമാനിച്ചാൽ പിന്നെ വലിയ ചില ചർച്ചകൾ നടക്കും. വസ്ത്രങ്ങളും ആഭരണങ്ങളും തിരഞ്ഞെടുക്കൽ, മേക്കപ്.... ഇതൊക്കെ വേണം. എങ്കിലും ഇതെല്ലാം അണിഞ്ഞിറങ്ങുന്ന വധുവിന്റെ ചർമവും മുടിയും ആരോഗ്യത്തോടെ തിളങ്ങുകയും വേണ്ടേ?

ഭാവി വധു അറിയാനായി പറയുന്നതാണേ, ഓഡിറ്റോറിയം ബുക് ചെയ്യാൻ വീട്ടുകാർ ഓടട്ടെ. അഴകും ആരോഗ്യവും നിലനിർത്താനുള്ള ഉത്തരവാദിത്തം നമുക്കു സ്വയമേറ്റെടുക്കാം.

ഓരോ വധുവിനും അനുയോജ്യമായ പാക്കേജസ് കോസ്മെറ്റിക് ഡെർമറ്റോളജിസ്റ്റ് നിർദേശിക്കും. അതുകൊണ്ട് തന്നെ ഇതൊരു "വൺഡേ വണ്ടർ ആണെന്നു കരുതേണ്ട. എന്നും നവവധുവിന്റെ തിളക്കത്തോടെയിരിക്കാൻ ഇതൊരു തുടക്കമാകട്ടേ.

വധുവിന് ചേരും പാക്കേജസ്

ആദ്യ ഘട്ടം കല്യാണപ്പെണ്ണിനെ അലട്ടുന്ന സൗന്ദര്യപരമായ അരക്ഷിതത്വം മന സ്സിലാക്കുക എന്നതാണ്. അത് ഓരോരുത്തർക്കും ഓരോന്നായിരിക്കും. ചിലർക്കത് മുഖത്തെ കറുത്ത പുള്ളികളാകാം. മറ്റു ചിലർക്ക് കവിളിനിരുവശത്തെ നേർത്ത രോമങ്ങളാകാം. ഇതൊന്നും വലിയ പ്രശ്നമാണെന്നല്ല. പക്ഷേ, അതൊക്കെ കല്യാണപ്പെണ്ണിനെ ടെൻഷനാക്കുന്നുണ്ടെങ്കിൽ അവ പരിഹരിക്കണം. ആത്മ വിശ്വാസത്തോടെ വിവാഹത്തിനൊരുങ്ങാൻ ഇതു സഹായിക്കും.

അടുത്ത ഘട്ടം കല്യാണപ്പെണ്ണിന്റെ ചർമം വിലയിരുത്തി വിദഗ്ധർ കണ്ടത്തുന്ന സൗന്ദര്യപ്രശ്നങ്ങളാണ്. മുഖക്കുരുവുണ്ടെങ്കിൽ അവ നിരീക്ഷിച്ചു കാരണം കണ്ടെത്തുക, നേരത്തേയെത്തിയ നേർത്ത ചുളിവുകൾ മോയിസ്ചറൈസേഷൻ പ്രശനമാണെന്നു മനസ്സിലാക്കി പരിഹരിക്കുക. ഇങ്ങനെ പലതും വിദഗ്ധർക്കു കണ്ടെത്താനും പരിഹരിക്കാനുമാകും.

പറയട്ടെ, ഒരുക്കം തുടങ്ങേണ്ട സമയം

ആറു മാസം മുൻപെങ്കിലും പ്രീ ബ്രൈഡൽ സ്കിൻ കെയർ തുടങ്ങുന്നതാണു നല്ലത്. ഇനി ആറു മാസം സമയം കിട്ടിയില്ലെങ്കിൽ മൂന്നുമാസം മുൻപെങ്കിലും കോസ്മറ്റോളജിസ്റ്റിനെ കാണുക.

വിവാഹത്തിനൊരുങ്ങാൻ ഇത്രയും സമയമോ എന്നു സംശയം തോന്നാം. ഒരു ട്രീറ്റ്മെന്റ് ആരംഭിച്ചാൽ അതു ചർമത്തിനു യോജിക്കുന്നുണ്ടോ, ഫലപ്രദമാണോ എന്നറിയാനും അവയുടെ ഫലം പൂർണമായി ലഭിക്കാനും മൂന്ന് - ആറു മാസം വേണം. ട്രീറ്റ്മെന്റ് ഫലപ്രദമായില്ലെങ്കിൽ പുതിയ ട്രീറ്റ്മെന്റ് തുടങ്ങേണ്ടി വരും. ഇതെല്ലാം കണക്കുകൂട്ടിയാണ് ആറു മാസം പറയുന്നത്.