ആ പ്രതീക്ഷയാണ് തെറ്റ്

'ഒറ്റയാൻ എന്ന വിശേഷണം എനിക്ക് വേണ്ട. പുതിയ വിശേഷങ്ങളും വിവാദങ്ങൾക്കുള്ള മറുപടികളുമായി ഷമ്മി തിലകൻ

- നകുല്‍ വി.ജി

അഭിപ്രായത്തിലും അഭിനയത്തിലും വേറിട്ട വഴിയാണ് ഷമ്മി തിലകന്റേത്. അച്ഛനിൽ നിന്നു പകർന്നു കിട്ടിയ കലയും കരുത്തും. പാരമ്പര്യം പോലെ തുടരുന്ന ഒറ്റയാൻ' എന്ന വിശേഷണം. പക്ഷേ, ആ വിളിയോട് ഷമ്മിക്ക് അത്ര യോജിപ്പില്ല. “ഒറ്റയാൻ എന്ന വിശേഷണം എനിക്ക് വേണ്ട. എന്റെ കൂടെ മറ്റാരും ഇല്ലാത്തതു കൊണ്ട് നിങ്ങൾക്ക് അങ്ങനെ തോന്നുന്നതാകാം.'' എന്ന ആമുഖത്തോടെ, പുത്തൻ വിശേഷങ്ങളും വിവാദങ്ങൾക്കുള്ള മറുപടികളും പങ്കു വച്ച് ഷമ്മി തിലകൻ വനിതയ്ക്കൊപ്പം.

തുറന്ന അഭിപ്രായപ്രകടനങ്ങൾ. അച്ഛന്റെ രീതി തന്നെയാണല്ലോ മകനും

അത്തരം പ്രതീക്ഷകളാണ് തെറ്റ് തിലകന്റെ മകൻ ഇങ്ങനെയായിരിക്കണം എന്നു കരുതേണ്ടതില്ല. അപ്പോഴാണ് നമ്മൾ കൂടുതൽ സമ്മർദത്തിലാകുക. ഞാനിപ്പോൾ അച്ഛനെക്കാൾ മോശമായെന്നോ, നന്നായിട്ടുണ്ടെന്നോ പറഞ്ഞാൽ, അല്ലെന്നു തിരുത്താനോ, ശരിയെന്ന് അംഗീകരിക്കാനോ അദ്ദേഹം ജീവനോടെയില്ല. പിന്നെന്തിനാണ് ആ ഉപമ.

ജനഗണമന, പാപ്പൻ, പാൽതു ജാൻവർ...കരിയറിലെ ഏറ്റവും നല്ല ഘട്ടമാണല്ലേ ?

'ജനഗണമന'യും 'പാപ്പനും ആ കഥാപാത്രങ്ങൾക്ക് അത്യാവശ്യമാണ് ഞാൻ എന്ന തോന്നലിൽ സംവിധായകർ വിളിച്ചതാണ്. സംവിധായകൻ എന്താണ് ആഗ്രഹിക്കുന്നത് എന്ന് ചോദിച്ചു മനസ്സിലാക്കി അഭിനയിക്കുന്നതാണ് എന്റെ രീതി. ജോഷിസാറിന്റെ നിരവധി സിനിമകളിൽ ഞാൻ അഭിനയിച്ചിട്ടുണ്ടെങ്കിലും രണ്ടേ രണ്ട് സിനിമകൾക്ക് മാത്രമേ അദ്ദേഹം എന്നെ നേരിട്ടു വിളിച്ചിട്ടുള്ളൂ. പ്രജ'യും 'പാപ്പനും. മറ്റവസരങ്ങളിൽ "ആ ഷമ്മിയോട് എന്നെയൊന്നു വിളിക്കാൻ പറ...' എന്ന് സർ പ്രൊഡക്ഷൻ കൺട്രോളറോട് പറയും. അതനുസരിച്ച് ഞാൻ അങ്ങോട്ട് വിളിക്കും. പ്രജ'യിലെ ബലരാമനും പാപ്പനി' ലെ ഇരുട്ടൻ ചാക്കോയും ജനപ്രീതി തന്ന കഥാപാത്രങ്ങളാണ്.

പാൽതു ജാൻവർലെ ഡോ സുനിൽ ഐസക്കിന്റെ ലുക്ക് മൂക്കില്ലാ രാജ്യത്തിലെ തിലകന്റെ ഗേറ്റപ്പിനോട് സാമ്യമുള്ളതായി ചർച്ചകൾ വന്നിരുന്നല്ലോ ?