விநாயகருக்கான லட்டு ரூ. 30 லட்சத்துக்கு ஏலம்!

தெலங்கானா மாநிலத்தின் தலைநகரம் ஐதராபாதில் ஒவ்வொரு ஆண்டும் பிள்ளையார் சதுர்த்தி பண்டிகையை முன்னிட்டு ஏற்பாடு செய்யும் உற்சவம் பதினோரு நாட்கள் விமரிசையாக நடைபெறுகிறது.

- - ராஜி ரகுநாதன் ஐதராபாத்

இரு தெலுங்கு மாநிலங்களில் இருந்து மட்டுமின்றி பிற மாநிலங்களில் இருந்தும் பிற நாடுகளில் இருந்தும் முப்பது லட்சத்திற்கும் மேலாக பக்தர்கள் வந்து மிகப் பெரிய பிள்ளையாரை தரிசித்து அருள் பெறுகிறார்கள். இறுதியில் பதினோராம் நாள் கிரேன் வாகனத்தில் ஏற்றி வாத்தியங்கள் முழங்க ஊர்வலமாக எடுத்துச் சென்று பிள்ளையாரை ஹுசைன் சாகர் ஏரியில் 'நீர் நிலைகளில்கரைக்கும்' ஒரு பெரும் திருவிழாவாக நடைபெறுகிறது.

ஐதராபாத் நகரில் 'கைரத்தாபாத்' என்றழைக்கப்படும் இடத்தில் மிகப் பெரிய பிள்ளையாரை உருவாக்கி உற்சவம் செய்யும் விழா 1954 - ம் ஆண்டுதொடங்கியது. 'கைரத்தாபாத் கணேஷ் உற்சவ கமிட்டி' இதனைத் திட்டமிட்டுத் திறம்படச் செயல்படுத்துகிறது. ஆரம்பத்தில் ஒரு அடி உயர பிள்ளையாரை வைத்துப் பூஜை செய்தார்கள். அதன் பின்னர் ஒவ்வொரு ஆண்டும் ஒவ்வொரு அடியாக உயர்த்தினர். சென்ற ஆண்டு 2024 - ல் எழுபது ஆண்டு கள் நிறைவு பெற்ற நிகழ்வாக 70 அடி உயரப் பிள்ளையாரைத் தயாரித்து பூஜை செய்தனர்.

இந்த உற்சவத்தின் சம்பிரதாயப்படி முதல் நாள் காலையில் நெசவாளி குடும்பத்தினர் பூஜை செய்வர். அவர்கள் கைத்தறி நூலைக் கொண்டு அறுபது அடி நீள அங்கவஸ்திரமும், அறுபது அடி 'காயத்ரி பூணூலும்' தயாரித்து 'கைரத்தாபாத்' விக்னேஸ்வரனுக்கு சமர்ப்பிக்கிறார்கள்.

தமிழ்நாட்டைச் சேர்ந்த சிற்பி ராஜேந்திரனோடு மேலும் 150 கலைஞர்கள் இணைந்து மூன்று மாதங்கள் குழுக்களாகப் பணிபுரிந்து விநாயகரின் சிலையை உருவாக்குகிறார்கள். சில ஆண்டுகளாக சுற்றுச் சூழல் பாதுகாப்பின்படி களிமண் சிலைகளைச் செய்து வருகிறார்கள்.