കുറ്റകൃത്യങ്ങളുടെ ജൈവരഹസ്യങ്ങൾ

ഒരാളിന്റെ സ്വഭാവം നിർണ്ണയിക്കുന്നതിൽ തലച്ചോറിന്റെ പങ്ക് എന്താണെന്ന് വിശദീകരിക്കുന്നു. ക്രിമിനൽ പെരുമാറ്റത്തിന്റെ നാഡീജീവശാസ്ത്രത്ത ക്കുറിച്ചുള്ള പ്രധാന ഗവേഷണ പ്രബന്ധങ്ങളെ പരിചയപ്പെടുത്തുന്നു. ഒരാളിന്റെ ജനിതകഘടകങ്ങൾ എങ്ങനെയാണ് ക്രിമിനൽ സ്വഭാവവുമായി ബന്ധപ്പെട്ടിരിക്കുന്നതെന്ന് വിശദമാക്കുന്നു.

- ഡോ. മനോജ് വെള്ളനാട് Neuro Surgeon SUT Hospital, Pattom Thiruvananthapuram

ഫീനിയാസ് കേജിന്റെ കഥ പലർക്കും സുപരിചിതമായിരിക്കും. വളരെ ശാന്തനും സൽസ്വഭാവിയുമായിരുന്ന അയാളുടെ തലച്ചോറിലൂടെ വലിയൊരു ഇരുമ്പുകമ്പി തുളഞ്ഞ് കയറി. ശസ്ത്രക്രിയകൾക്കു ശേഷം രക്ഷപെട്ടുവന്ന ഫീനിയാസ് കേജ് എല്ലാവർക്കും അപരിചിതനായ മറ്റൊരു മനുഷ്യനായിരുന്നു. ശാന്തനും സുശീലനുമായിരുന്ന അയാൾ പെട്ടെന്നുതന്നെ ഒരു സാമൂഹിക വിരുദ്ധനും ക്രിമിനലുമായി മാറി. മനുഷ്യന്റെ തലച്ചോറിനെപ്പറ്റിയുള്ള അതുവരെയുള്ള അറിവുകൾക്കു മേൽ വിപ്ലവകരമായ കുതിപ്പ് നൽകിയ വ്യക്തിയായിരുന്നു ഫീനിയാസ് കേജ് എന്ന രോഗി. മനുഷ്യനെ ശരിക്കും മനുഷ്യനാക്കുന്നത് അവന്റെ തലച്ചോറിന്റെ ഫ്രോണ്ടൽ ലോബ് എന്ന് പറയുന്ന ഭാഗമാണെന്ന് ശാസ്ത്രലോകം തിരിച്ചറിയുന്നത് ഈയൊരു സംഭവത്തിന്റെ പശ്ചാത്തലത്തിലാണ്.

മറ്റൊരു രോഗിയുണ്ടായിരുന്നു, ചാൾസ് വിറ്റ്മാൻ, അയാളും നല്ലവനായിരുന്നു. എന്നാൽ, പിന്നീട യാൾ ഒരു കൊടിയ കുറ്റവാളിയായി മാറി, പതിനാറുപേരെ വെടിവെച്ച് കൊന്നുകളഞ്ഞു. പരിശോധനയിൽ അയാളുടെ തലച്ചോറിലെ വലതു ടെമ്പറൽ ലോബിൽ വലിയൊരു ട്യൂമർ കണ്ടെത്തുകയുണ്ടായി. അതാണയാളെ ഒരു ക്രിമിനലാക്കിയതെന്നു പറയാം. എന്നുവച്ചാൽ, ടെമ്പറൽ ലോബിലെ പ്രശ്നം കാരണമാണോ ഒരാൾ ക്രിമിനലാവുന്നത്? അതോ ഫീനിയാസ് കേജിന്റെതു പോലെ ഫ്രോണ്ടൽ ലോബാണോ?

വേറെയും പല ഉദാഹരണങ്ങൾ ചൂണ്ടിക്കാണിക്കാൻ ശാസ്ത്രചരിത്രത്തിൽ ഉണ്ടാവും. ഇവയിലെല്ലാം തലച്ചോറിന്റെ ഏതെങ്കിലും ഒരു പ്രത്യേക ഭാഗത്തിന് പ്രശ്നമുള്ളതു കൊണ്ടാണ് ആ വ്യക്തി ഒരു ക്രിമിനൽ സ്വഭാവമുള്ള ആളായത് എന്നുപറയാൻ പ്രയാസമാണ്. കാരണം, മാനുഷികമായ, സ്നേഹമസൃണമായ പെരുമാറ്റമെന്ന് പറയുന്നത് തലച്ചോറിന്റെ ഏതെങ്കിലും ഒരു ഭാഗത്തിന്റെ മാത്രം സ്വഭാവസവിശേഷതയല്ല എന്നതുതന്നെ.

ക്രിമിനൽ സ്വഭാവങ്ങളുടെ ന്യൂറോബയോളജി മനുഷ്യന്റെ തലച്ചോറിന്റെ പ്രവർത്തനവും പെരുമാറ്റവും തമ്മിലുള്ള സങ്കീർണ്ണമായ ബന്ധത്തെപ്പറ്റി പഠിക്കുന്ന ഒരു മേഖലയാണ്. ഇത് ന്യൂറോസയൻസ്, സൈക്യാട്രി, ക്രിമിനോളജി എന്നിവയുടെ ഒരു സംയോജിത മേഖല കൂടിയാണ്. ക്രിമിനൽ പെരുമാറ്റത്തിനു പിന്നിലെ ജൈവശാസ്ത്രപരമായ അടിത്തറ മനസ്സിലാക്കാൻ ശ്രമിക്കുമ്പോൾ, തലച്ചോറിന്റെ ഘടന, രാസപ്രവർത്തനങ്ങൾ, ജനിതക ഘടകങ്ങൾ എന്നിവയെല്ലാം പ്രത്യേകം പരിഗണിക്കേണ്ടതുണ്ട്.