എഞ്ചിനീയറിങ് പ്രവേശനത്തിലെ വിവാദങ്ങൾ

കേരളത്തിലെ എഞ്ചിനീയറിങ് പ്രവേശന പരീക്ഷയുമായി ബന്ധപ്പെട്ട സംവാദം തുടരുന്നു. എഞ്ചിനീയറിങ് പരീക്ഷയുമായി ബന്ധപ്പെട്ട മാർക്ക് സമീകരണ വിവാദത്തെ വിമർശനബുദ്ധ്യാ വിലയിരുത്തുന്നു. വ്യത്യസ്ത സ്ട്രീമുകളിൽ പഠിച്ച് പൊതുവായ പ്രവേശന പരീക്ഷയെഴുതുന്ന വിദ്യാർഥികളെ നിലവിലെ മാർക്ക് സമീകരണരീതി എങ്ങനെ ബാധിക്കുമെന്ന് വ്യക്തമാക്കുന്നു.

- ആർ. സുരേഷ്കുമാർ

കേരളത്തിലെ എഞ്ചിനീയറിങ് പ്രവേശനത്തിന് റാങ്ക് ലിസ്റ്റ് തയ്യാറാക്കുന്നതുമായി ബന്ധപ്പെട്ട് പരാതികളും ആക്ഷേപങ്ങളും ശക്തമായിരിക്കുകയാണല്ലോ. 2009 ലാണ് പ്രവേശനപരീക്ഷക്ക് ലഭിക്കുന്ന സ്കോറിനൊപ്പം യോഗ്യതാപരീക്ഷക്ക് വിവിധബോർഡുകൾ നൽകുന്ന സ്കോറുകൾ സമീകരിച്ച് (സ്റ്റാൻഡേർഡൈസ് ചെയ്ത്) റാങ്ക്ലിസ്റ്റ് തയ്യാറാക്കുന്നരീതി ആരംഭിച്ചത്. അതിനുശേഷം, മാർക്ക് സമീകരണം സി ബി എസ് ഇ സ്ട്രീമിലെ വിദ്യാർഥികൾക്ക് ദോഷമായി മാറുന്നുവെന്ന കാരണം പറഞ്ഞ് ഹൈക്കോടതിയിൽ കേസുകൾ വരുകയും സമീകര ണത്തിനുള്ള ശാസ്ത്രീയ ഫോർമുല കോടതി അംഗീകരിക്കുകയും ചെയ്തതാണ്. ഇപ്പോൾ സംസ്ഥാന ബോർഡിനു കീഴിൽ പഠിക്കുന്ന വിദ്യാർഥികളെ ദോഷകരമായി ബാധിക്കുന്നുവെന്നാണ് പരാതികൾ ഉയരുന്നത്. മുമ്പ്, സി ബി എസ് ഇ വിദ്യാർഥികളും ഇപ്പോൾ സംസ്ഥാന ബോർഡിലെ വിദ്യാർഥികളും മാർക്ക് സമീകരണരീതി തങ്ങൾക്ക് ദോഷകരമായി മാറിയെന്ന് പറഞ്ഞതിന്റെ വിവിധവശങ്ങൾ വിദ്യാഭ്യാസ സമീപനങ്ങളുമായി ബന്ധപ്പെട്ട വിശകലനത്തിന് വിധേയമാക്കേണ്ടതാണ്. അതെല്ലാം എഞ്ചിനീയറിങ് പ്രവേശനത്തിന്റെ റാങ്ക്ലിസ്റ്റിന്റെ കാര്യത്തിൽമാത്രം ഉൾപ്പെടുത്താനാവില്ല. ഡാറ്റ വിശകലനം ചെയ്ത് നിഗമനങ്ങളിലെത്തുന്നത് ശാസ്ത്രീയമായ രീതിതന്നെയാണ്. ഗവേഷണങ്ങൾക്കെല്ലാം നാം ആശ്രയിക്കുന്ന രീതിയുമതാണ്. അതിനാൽ, എല്ലാ പരീക്ഷാബോർഡുകൾക്കും ഒരേ മാനദണ്ഡം അവലംബിക്കുന്ന സമീകരണ ഫോർമുല തെറ്റാണെന്ന് പറയാനാവില്ല. സാമൂഹികമായ പ്രത്യേക കാരണങ്ങളാൽ അത്തരം ഫോർമുലകൾ ഉപയോഗിക്കേണ്ടതുണ്ടോ എന്ന് നയപരമായി സർക്കാർ തീരുമാനിക്കേണ്ട വിഷയമാണ്. സ്റ്റാറ്റിസ്റ്റിക്കൽ ഫോർമുലയു ടെ ശാസ്ത്രീയതയിൽ മുറുകെ പിടിച്ചതുകൊണ്ടോ അതിവൈകാരികമായ പ്രതികരണങ്ങൾ കൊണ്ടോ ചില വിഷയങ്ങൾ പരിഹരിക്കാനാവില്ല. സർക്കാർ സ്കൂളുകളിൽ പഠിച്ച വിദ്യാർഥികൾക്ക് മെഡിക്കൽ പ്രവേശനത്തിൽ പ്രത്യേകം സീറ്റുകൾ മാറ്റിവെക്കണമെന്നും ദേശീയതലത്തിൽ നടത്തുന മെഡിക്കൽ പ്രവേശനപരീക്ഷ നിർത്തലാക്കണമെന്നും തമിഴ്നാട് സർക്കാർ ആവശ്യപ്പെട്ടത് പൊതുവായ സമീകരണ ഫോർമുല യിൽ വിശ്വാസമില്ലാത്തതു കൊണ്ടു കൂടിയാണെന്ന് പറയേണ്ടിവരും. എന്നാൽ, നിയമവ്യവഹാരങ്ങളിൽ ദേശീയതലത്തിൽ സ്വീകരിച്ചിട്ടുള്ള മാനദണ്ഡങ്ങൾക്കാണ് മേൽക്കെ കിട്ടുന്നതെന്നതിനാൽ പലപ്പോഴും സംസ്ഥാനങ്ങൾക്ക് പരിമിതികൾ ഉണ്ടാവുന്നുമുണ്ട്.