സ്വാമിനാഥൻ ഇതിഹാസ ശാസ്ത്രകാരൻ

ഏഷ്യയിൽ പട്ടിണി അകറ്റിയ ഹരിത വിപ്ലവത്തിന്റെ പിതാവ് ഡോ. എം എസ് സ്വാമിനാഥനെ അനുസ്മരിക്കുന്നു. - ഡോ. എം എസ് സ്വാമിനാഥന്റെ ഗവേഷണ മേഖലകളിലെയും നയരൂപീകരണ മേഖലകളിലെയും സംഭാവനകളെ പരിചയപ്പെ ടുത്തുന്നു. - ഡോ. എം എസ് സ്വാമിനാഥൻ മികച്ച ഗവേഷകൻ, അതിലേറെ നല്ല അധ്യാപകനുമായിരുന്നു എന്ന് സാക്ഷ്യപ്പെടുത്തുന്നു.

- ഡോ. കെ.ജി. പദ്മകുമാർ

ഏതൊരു നാടിന്റെയും ചരിത്രപഥങ്ങളിൽ അവിടുത്തെ സാമൂഹിക സാംസ്കാരിക മണ്ഡലങ്ങൾക്ക് ശോഭ പകർന്ന പ്രതിഭാശാലികളുടെ പാദമുദ്രകൾ പതിഞ്ഞു കിടക്കുന്നത് കാണാം. ജീവിതദൗത്യം പൂർണ്ണമാക്കി മൺമറഞ്ഞ ആ സൂകൃത ജീവിതങ്ങളുടെ സ്മരണകൾ തന്നെ ആവേശകരമാണ്. നമ്മുടെ രാജ്യത്തിൽ ഒരു പ്രകാശ ഗോപുരം പോലെ പ്രഭാപുരം പ്രസരിപ്പിച്ച്, അനേകം സംഭാവനകൾ നൽകി പിൻവാങ്ങിയ പ്രൊഫസർ സ്വാമി നാഥൻ അത്തരത്തിൽ ഒരാളായിരുന്നു. സ്വാമിനാഥനെ ഒരു ശാസ്ത്ര പ്രതിഭാസം എന്നാണു ശാസ്ത്ര ലോകം വിശേഷിപ്പിക്കുന്നത്. ജനിതക ശാസ്ത്ര സംഭാവനകളിലൂടെ വിശപ്പുരഹിത ലോകത്തിനു വഴിയൊരുക്കിയ ശാസ്ത്രകാരൻ. 1970-ൽ നൊബേൽ സമ്മാനം നേടിയ ഹരിതവിപ്ലവ ശില്പി ഡോ. നോർമൻ ബൊർലോഗ് പ്രൊഫ. സ്വാമിനാഥന് ഒരു കത്ത് എഴുതി.

“എനിക്ക് കിട്ടിയ ഈ അംഗീകാരത്തിന്റെ യഥാർഥ ബഹുമതി താ ങ്കൾക്ക് അവകാശപ്പെട്ടതാണ്. അങ്ങാണ് ഞാൻ വികസിപ്പിച്ച മെക്സിക്കൻ കുറിയ ഇനത്തിന്റെ സാധ്യത ആദ്യം കണ്ടെത്തിയത്. അത് സംഭവിച്ചില്ലായിരുന്നെങ്കിൽ ഏഷ്യയിൽ ഹരിത വിപ്ലവം സാധ്യമാകുമായിരുന്നില്ല. 1999 ആഗസ്റ്റ് മാസം അമേരിക്കയിലെ ടൈം വാരിക ഏഷ്യൻ ഭൂഖണ്ഡത്തിൽ 20-ാം നൂറ്റാണ്ടിനെ ഏറ്റവും സ്വാധീനിച്ച  മൂന്നു വ്യക്തികളെ കണ്ടെത്തി; മഹാത്മാ ഗാന്ധി, രവീന്ദ്ര നാഥ ടാഗോർ, പ്രൊഫ. സ്വാമിനാഥൻ എന്നിവർ. ഏഷ്യയിൽ പട്ടിണിയകറ്റിയ ഹരിത വിപ്ലവത്തിന്റെ യഥാർഥ പിതാവ് ഡോ. സ്വാമിനാഥനാണ്. കഠിന പ്രയത്നം കൊണ്ടും നിശ്ചയദാർഢ്യം കൊണ്ടുമാണ് ഈ അംഗീകാരം അദ്ദേഹം നേടിയത്.