EINA NA TREKKER OOR SEUN (8) RY

'N AGJARIGE seuntjie van Lutzville ondergaan vandeesweek sy sesde operasie in die Rooi Kruis-kinderhospitaal in Kaapstad nadat 'n trekker glo in Maart oor hom gery het.

- CHRISLYNN SIAS-LOUW

Wat dinge nog erger maak, is die feit dat die saak glo uit die hof gegooi en van die rol geskrap is sonder dat die polisie een keer die slagoffer se verklaring geneem het.

Die bestuurder van die trekker loop skotvry buite rond terwyl Sally-Ann van der Byl en haar seuntjie, Selwyn (8), hospitaal-in en -uit is.

Die mamma en seuntjie is juis weer dié week in die Kaap omdat Selwyn vandag sy sesde operasie aan sy blaas ondergaan omdat hy steeds sukkel om te piepie.

Volgens Sally-Ann het die ongeluk op 11 Maart in die lokasie waar hulle woon, plaasgevind.

Sy vertel: "Die kinders het by die Bok-hokke agterop die trekker se wa gespeel. Die bestuurder van die trekker het toe later ingeklim en begin ry. Dit is toe dat hy Selwyn tref en ook oor hom ry. Volgens die kinders wat by Selwyn was het hy (die drywer) ná die voorval nog omgekyk en net weggery."

Gehardloop

Een van Selwyn se maatjies het hom op sy rug gesit en saam met hom na Sally-Ann gehardloop. Die mamma sê haar moederhart het amper uit haar bors gespring toe sy hoor wat pas met haar kind gebeur het. Volgens haar het sy die polisie en ambulans na die toneel ontbied.