പുരസ്കാരം

പതിനായിരമെങ്കിൽ പതിനായിരം കിട്ടുന്നത് ലാഭമല്ലേ

- സുരേഷ്കുമാർ പാർളിക്കാട് 9497068967

ടൗണിൽ നിന്ന് കുറച്ചു മാറി, അധികം തിരക്കില്ലാത്ത സ്ഥലത്താണ് ഉൻമേഷ് കുമാർ ഉടമസ്ഥനും കാര്യക്കാരനുമൊക്കെയായ ആ ഹോട്ടൽ സ്ഥിതി ചെയ്യുന്നത്. ഉൻമേഷിനെക്കൂടാതെ ഭാര്യ കുശലകുമാരിയ്ക്കാണ് പ്രസ്തുത ഹോട്ടലിന്റെ മേൽനോട്ടച്ചുമതലയുള്ളത്.

സായാഹ്നസൂര്യൻ വിട പറയുന്ന സമയമായിട്ടും അന്ന് ഉണ്ടാക്കിയ പരിപ്പുവട, ഉഴുന്നുവട, പഴംപൊരി തുടങ്ങിയ ചെറുകടികൾ നിറഞ്ഞ ഗ്ലാസ്സ് അലമാരി ശൂന്യമാകാത്തതിൽ ഉൻമേഷ് കുമാറിന് ലേശം നിരാശ തോന്നാതിരുന്നില്ല. നിരാശയിൽ നിന്ന് മുക്തി നേടാൻ ഉൻമേഷ് മൊബൈലിൽ വാട്ട്സാപ്പിന്റെ ജാലകങ്ങൾ തുറന്നു. ഉൻമേഷിനെക്കുറിച്ച് പറയുമ്പോൾ ഒരു കാര്യം കൂടി പറയണം. ടിയാൻ ലേശം കവിതാകമ്പമുള്ള ആൾകൂടിയാണ്. അതുകൊണ്ട് അങ്ങനെയുള്ള ചില ഗ്രൂപ്പുകളിലും അയാൾ അംഗമാണ്. അങ്ങനെ ഗ്രൂപ്പുകളിലൂടെ സഞ്ചരിക്കുമ്പോഴാണ് ആ വാർത്ത അയാളുടെ ശ്രദ്ധയിൽ പെടുന്നത്. "മഹാകവി ഉദ്ദണ്ഡൻ സ്മാരക കവിതാ പുരസ്കാരത്തിന് കവിതകൾ ക്ഷണിക്കുന്നു. അവാർഡ് തുക ഇരുപതിനായിരം രൂപ. സൃഷ്ടികൾ അയയ്ക്കേണ്ട നമ്പരും അവസാനതീയതിയും മറ്റും കൊടുത്തിട്ടുണ്ട്.

ഒരു കൗതുകത്തിന് ഉൻമേഷ് ആ നമ്പറിലേക്ക് കോൾ ചെയ്തു. എന്റെ പേര് ഉൻമേഷ് കുമാർ കവിതകൾ എഴുതാറുണ്ട്. നിങ്ങളുടെ കവിതാമത്സരത്തിന്റെ അറിയിപ്പ് കണ്ടു.

സെക്രട്ടറി എന്ന് വിശേഷിപ്പിച്ചയാൾ പ്രാഥമികമായ കാര്യങ്ങൾ പറഞ്ഞ ശേഷം ചോദിച്ചു. സാർ കവിതാ സമാഹാരം ഇറക്കിയിട്ടുണ്ടോ?