(બીજા) પરેશ રાવલ થવાનાં અરમાન

કન્ટેન્ટ ક્રિયેટર, અભિનેતા અને હવે, સ્ટેન્ડઅપ કૉમેડિયન. ફ્રેન્ડ અને ફૅમિલી સાથે માણી શકે એવા હાસ્ય સાથે સૌપ્રથમ વાર ગુજરાતની ટૂર કરી રહેલો વિરાજ ઘેલાણી ‘ચિત્રલેખા’ની ઑફિસની મુલાકાતે આવે છે ત્યારે થાય છે જલસા જ જલસા...

- કેતન મિસ્ત્રી (મુંબઈ)

એની મમ્મી માટે લોહીનો ઉકાળો ને ખોટા ખર્ચા કરનારો છોકરો, નાની માટે બીજે ક્યાં જવાનો? ભૂતનું ઘર પીપળો અને સુપર હિટ ગુજરાતી ફિલ્મ ઝમકૂડીનો બાબલો વિરાજ ઘેલાણી એક વરસાદી સાંજે મુંબઈમાં ચિત્રલેખાની ઑફિસે આવે છે ગપ્પાં મારવા... અને ગપ્પાંગોષ્ઠિમાં જૂની-નવી વાતો વરસે છે અનરાધાર. ઈન્સ્ટાગ્રામ, યુટ્યૂબ જેવાં ઈન્ટરનેટનાં વિવિધ મિડિયા પર મશ્કરા વિડિયો બનાવતા વિરાજનો નૉટ સો મશ્કરો ઈન્ટરવ્યૂ.

ચડ્ડી પહન કે ફલ ખીલા હૈ...

મુંબઈમાં મધ્યમવર્ગી લોહાણાપરિવારમાં જન્મેલો વિરાજ એન્ટરટેઈન્મેન્ટ તરફ વળ્યો એનાં મૂળિયાં બાળપણમાં છે. એ કહે છેઃ ‘નાનો હતો ત્યારે ચાળા પાડવામાં એક્સ્પર્ટ હતો. બધે હોય એમ અમારી બિલ્ડિંગમાંય એક-બે રહેવાસી ખડૂસ હતા. ક્રિકેટ રમતાં બૉલ એમના ઘરમાં જાય તો ન આપે, અમે રમી ન શકીએ એટલે કમ્પાઉન્ડની લાઈટ બંધ કરી દે, વચ્ચોવચ કાર પાર્ક કરી દે. હું આવા લોકોના ચાળા પાડતો. દોસ્તોને એ ગમતું ને ફરમાઈશ કરતા કે હવે ફલાણાના ચાળા પાડ. ઘરે મહેમાન આવે તો મમ્મી-પપ્પા એમની સામે કંઈ કરવાનું કહે એ પહેલાં હું જરાય શરમાયા વિના ડાન્સ કે ઍક્ટિંગ જેવી કળા બતાવી દેતો. હું જે કરું એથી લોકો ખુશ થાય, તાળી પાડે, એમાં મને બહુ મજા આવતી અને એ રીતે અટેન્શન મળતું એ ગમતું. અહીંથી એન્ટરટેઈન્મેન્ટનો કીડો લાગ્યો.'

લાઈફ ઈઝ અ રેસ...

શાળાશિક્ષણ બાદ વિરાજે એન્જિનિયરિંગમાં ડિપ્લોમા કર્યો, ડિગ્રી લેવી જરૂરી હતી એટલે એમાં ઍડ્મિશન લીધું, પણ મન લાગતું નહોતું. એ કહે છેઃ ‘એન્જિનિયરિંગ જામતું નહોતું. વળી, વરસની અઢી લાખ રૂપિયા ફી હતી એ કાઢવાનો પણ પ્રશ્ન હતો એટલે બ્રેક લેવો જરૂરી હતો. ઘરમાં ચર્ચા થઈ ને ટ્યુશન-ટીચર મમ્મી બિજલબહેને કહ્યુંઃ જા, એક વર્ષ ને આપ્યું... જી લે અપની ઝિંદગી. એક વર્ષમાં બાત ન બની તો ફરી એન્જિનિયરિંગ કરવું પડશે!' એટલે અધવચ્ચેથી એન્જિનિયરિંગ છોડી વિરાજ ઑડિશન આપવા માંડ્યો. ઉલ્લેખનીય છે કે વિરાજનાં મમ્મી શિક્ષણને પ્રાધાન્ય આપે છે. એમનું માનવું છે કે જીવનમાં જે કરવું હોય, જે શોખ હોય એ પૂરા જરૂર કરો, પણ એક ડિગ્રી તો હોવી જ જોઈએ. એ તમને તમારા ખરાબ સમયમાં કામ આવશે. આજેય બિજલબહેન સ્કૂલ-કૉલેજના સ્ટુડન્ટ્સને ભણાવે છે.

ઓક્કે, પણ ભણતરમાંથી બ્રેક લઈને વિરાજને કરવું’તું શું?