સિનેમાવાળાના અસહકારના આંદોલનનું સત્ય-અસત્ય...

ટિન્સેલ અને ગ્લિસેરિનની દુનિયામાં હાલ એક ચર્ચા ચાલી રહી છેઃ શું સ્ટારની આભા કામની શિસ્ત કરતાં મોટી હોઈ શકે? ‘ડૉન-થ્રી’માંથી રણવીર સિંહની અચાનક એક્ઝિટે માત્ર એ ફિલ્મ જ નહીં, પણ બોલીવૂડના પરંપરાગત વ્યવહારને હચમચાવી દીધો. જો કે સ્ટાર-પાવર અને પ્રોફેશનલ કૉન્ટ્રાક્ટ વચ્ચેનાં બદલાતાં સમીકરણોનો આ કંઈ પહેલો કિસ્સો નથી. આપણે ત્યાં જ નહીં, હોલીવૂડમાં પણ આવા કિસ્સા ગાજ્યા છે.

- કેતન મિસ્ત્રી (મુંબઈ)

ભા ઈ, ભાઈ, ભાઈ... આજકાલ બોલીવૂડમાં ફિલ્મ કરતાં એનો પરદા પાછળનો ડ્રામા હાઉસફુલ થઈ જાય છે. આમ જ પરદા પાછળની પોળમાં એક-બે ગરમાગરમ કિસ્સા ચર્ચામાં છે. પહેલો કિસ્સો નિર્માતા વાશુ ભગનાની અને રમેશ તોરાણી વચ્ચેની ખટપટનો છે. રમેશ તોરાણી પોતાની ફિલ્મ, ડેવિડ ધવન દિગ્દર્શિત હૈ જવાની તો ઈશ્ક હોના હૈ રિલીઝ કરવાનાં ચક્ર ગતિમાન કરી રહ્યા છે ત્યારે વાશુ એ ચક્રમાં પાનું (સ્પેનર) ફસાવીને ચક્રો અટકાવી દેવાના પ્રયાસ કરી રહ્યા છે. એમનું કહેવું છે કે વરુણ ધવનને ચમકાવતી આ ફિલ્મમાં ચુનરી ચુનરી સોન્ગ પર મારો અધિકાર છે, તોરાણી એ ન વાપરી શકે.

બીજી બાજુ, બોલીવૂડના બે મોટા ભાઈ-રણવીર સિંહ અને ફરહાન અખ્તર વચ્ચે જબરદસ્ત ખટપટ ચાલી રહી છે. ફરહાનના સુપર-મેગા પ્રોજેક્ટ ડૉન-થ્રીમાંથી રણવીરે અચાનક એક્ઝિટ મારી દીધી. ગયા ડિસેમ્બરમાં રણવીરે ફિલ્મ છોડી અને નો કમેન્ટ્સની નીતિ અપનાવી એ ઘેર બેસી ગયો. આ તરફ, ફરહાનમિયાંએ નિર્માતાઓના ઍસોસિયેશનનો રસ્તો લીધો. લાઈટમૅનથી લઈને મેકઅપ આર્ટિસ્ટ સુધીનાં ૩૦થી વધુ યુનિયનોના સંગઠન એવા ફેડરેશન ઑફ વેસ્ટર્ન ઈન્ડિયા સિને એમ્પ્લોય્ઝ (FWICE) સુધી મામલો પહોંચી ગયો. સંગઠનના નેતા અશોક પંડિતે આદેશ બહાર પાડ્યોઃ રણવીરને કોઈએ સહકાર નહીં આપવાનો. એના કહેવા મુજબ, કોઈ પણ સુપરસ્ટાર ફિલ્મ ઈન્ડસ્ટ્રીના નિયમોથી ઉપર હોઈ ન શકે...

મુશ્કેલી એ છે કે ફેડરેશનના આદેશને કોઈ કાયદાકીય પીઠબળ નથી, છતાં નૉન કો-ઑપરેશનનું વજન તો ખરું. અહીં એક વાત એ સમજવાની કે આજના જમાનામાં એક ફિલ્મ એ માત્ર ફિલ્મ નથી. આજે કરોડોનાં બજેટ, દેશ-વિદેશોમાં રિલીઝની નિયત તારીખ, ઓટીટીવાળા સાથેના સોદાનાં ગણિત મંડાતાં હોય છે. એવામાં મુખ્ય કલાકારની ઓચિંતી એક્ઝિટ માત્ર નિર્માતાઓનાં બ્લડ પ્રેશર વધારી મૂકતી નથી, પરંતુ ફિલ્મના સેટ્સ પર કામ કરતા ટેક્નિશિયનો, સ્પૉટ બૉય્ઝ અને કૅમેરા ક્રૂનાં પેટ પર લાત મારે છે. એમની રોજી-રોટી ફિલ્મોનાં શિડ્યુઅલ પર ટકેલી હોય છે.