ഗോവണി സുരക്ഷിതമാക്കാം

ഗോവണി ഡിസൈനിൽ പരീക്ഷണങ്ങൾ വന്നതോടെ സുരക്ഷയിലും അനായാസ ഉപയോഗത്തിലും കൂടുതൽ ശ്രദ്ധ നൽകാം

- 

വീടിന്റെ ഭംഗി നിശ്ചയിക്കുന്നതിൽ ഇന്ന് സ്റ്റെയർ കെയ്സ് വലിയ പങ്കുവഹിക്കുന്നുണ്ട്. പണ്ട് വീടിന്റെ ഒരു കോണിൽ ആരാലും ശ്രദ്ധിക്കപ്പെടാതെ കിടന്നിരുന്ന ഗോവണി ഇന്ന് ഇന്റീരിയറിലെ താരമാണ്. രണ്ടു നിലകളെയും തമ്മിൽ ബന്ധിപ്പിക്കുക എന്ന കർത്തവ്യമല്ലാതെ മറ്റൊരു ലക്ഷ്യവും അന്ന് ഗോവണിക്കുണ്ടായിരുന്നില്ല. ഗോവണി വീടി ന്റെ സൗന്ദര്യത്തെ സ്വാധീനിക്കുന്ന പ്രധാന ഘടകമായതോടെ ഡിസൈനിൽ പരീക്ഷണങ്ങളുടെ ചാകരയാണ്.

ഭംഗിക്കു കൂടുതൽ പ്രാധാന്യം കൈവരികയും വ്യത്യസ്തതയ്ക്കായി ഭാവന ചിറകു വിടർത്തുകയും ചെയ്യുമ്പോൾ സുരക്ഷിതത്വം മറക്കാൻ പാടില്ല. കയറുമ്പോഴും ഇറങ്ങുമ്പോഴും ആയാസരഹിതമാകാനും ശ്രദ്ധിക്കണം. ആറ് വയസ്സുകാരനും അറുപതു വയസ്സുകാരനും ഉപയോഗിക്കാനുള്ളതാണ് എന്ന വസ്തുത ഓർമിച്ചുവേണം ഗോവണി രൂപകൽപന ചെയ്യാൻ.

അളവുകൾ പ്രധാനം

ഒരു പടിയുടെ ഘടകങ്ങൾ എന്നു പറയുന്നത് റൈസ്, ട്രേഡ്/ റൺ, നോസിങ് എന്നിവയാണ്. ഒരു പടിയിൽ നിന്ന് അടുത്തതിലേക്ക് കാലെടുത്തു വയ്ക്കാനുള്ള ഉയരമാണ് റൈസ് (rise). ചവിട്ടുന്ന ഭാഗം അഥവാ പടിയാണ് ട്രേഡ് (tread). പടിയിൽ നിന്ന് പുറത്തേക്ക് അല്പം തള്ളിനിൽക്കുന്ന ഭാഗമാണ് നോസിങ് (nosing).