വീടാകണം ഹാപ്പി സ്പേസ്

സിനിമാതാരം പ്രിയങ്ക നായർ ഇന്റീരിയറിനെ കുറിച്ചുള്ള സങ്കൽപങ്ങളും ആശയങ്ങളും പങ്കുവയ്ക്കുന്നു

- തയാറാക്കിയത്. സിനു കെ. ചെറിയാൻ

ഓടുമേഞ്ഞ മേൽക്കൂര, വരാന്ത, നടുമുറ്റം... നൊസ്റ്റാൾജിയയുടെ വർണക്കടലാസിൽ പൊതിഞ്ഞതായിരുന്നു വീടിനെപ്പറ്റിയുള്ള എന്റെ സങ്കൽപങ്ങളെല്ലാം വാമനപുരം എന്ന ഗ്രാമവും അച്ഛന്റെയും അമ്മയുടെയും തറവാടുകളുമൊക്കെയാകാം മനസ്സിൽ ഈ ചിത്രമെഴുതിയത്. പക്ഷേ, ഇപ്പോൾ എന്റെ ഇഷ്ടങ്ങൾക്കും അഭിരുചികൾക്കും മാറ്റം വന്നിരിക്കുന്നു. 16 വർഷം മുൻപ് തറവാടിനടുത്ത് പുതിയ വീട് പണിതപ്പോഴുള്ള ഇഷ്ടങ്ങളല്ല ഇപ്പോഴുള്ളത്. സാധനങ്ങൾ കുത്തിനിറയ്ക്കാത്ത, ഫ്രീ സ്പേസ് ആവശ്യത്തിനുള്ള ധാരാളം കാറ്റും വെളിച്ചവും കടക്കുന്ന തരത്തിലൊരു വീട്. ചുരുക്കിപ്പറഞ്ഞാൽ മിനിമലിസ്റ്റിക് പ്രകൃതത്തോടാണ് ഇപ്പോൾ താൽപര്യം കൂടുതൽ.