ഞങ്ങൾ കൂടെയുണ്ട്

ഉത്തരവാദിത്ത ആർക്കിടെക്ചറിന്റെ പ്രസക്തി ഊന്നിപ്പറയുകയാണ് IIA കേരള ചാപ്റ്ററിന്റെ പുതിയ ചെയർമാൻ വിനോദ് സിറിയക്

- സോന തമ്പി

രണ്ട് വർഷത്തോളം IIA (ഇന്ത്യൻ ഇൻ കോഴിക്കോട് സെന്ററിന്റെ തലപ്പത്തും പിന്നീട് പിന്തുണയുമായി നടന്ന അനുഭവവഴികളാണ് ഇന്ന് IIA കേരള ചാപ്റ്റർ ചെയർമാൻ ആയി അവരോധിക്കപ്പെട്ടപ്പോൾ വിനോദ് സിറിയക്കിന്റെ മുതൽക്കൂട്ട്. അദ്ദേഹത്തിന്റെ ദീർഘവീക്ഷണങ്ങൾക്കും, തത്വസംഹിതകൾക്കും, പദ്ധതികൾക്കുമൊപ്പം അൽപസമയം...

On the streets എന്ന പദ്ധതി എങ്ങനെ വിജയിപ്പിച്ചെടുത്തു?

2013 ലാണ് IIA കോഴിക്കോട് സെന്റർ ചെയർമാൻ ആയത്. അന്ന് കൈക്കൊണ്ട തീം ആയിരുന്നു ഇത്. നടത്താൻ പറ്റുമോ എന്ന് ഉറപ്പില്ലായിരുന്നെങ്കിലും എന്റെ ആശയങ്ങളെപ്പറ്റി പൂർണ ആത്മവിശ്വാസമുണ്ടായിരുന്നു. എന്നോടൊപ്പം ഊർജസ്വലരായ ഒരു കൂട്ടം യുവ ആർക്കിടെക്ടുമാരും ഉണ്ടായിരുന്നു. കോഴിക്കോട്ടെ എംഎൽഎ ആയിരുന്ന പ്രദീപ്കുമാർ ഞങ്ങളുടെ ആശയങ്ങൾക്കൊപ്പം നിന്നു. തന്റെ അസ്സറ്റ് ഫണ്ട് അദ്ദേഹം, ദീർഘവീക്ഷണത്തോടെ സ്ക്കൂൾ, പൊതുമേഖലാസ്ഥാപനങ്ങൾ എന്നിവയുടെ ഡിസൈൻ അധിഷ്ഠിത നിർമാണത്തിന് വിനിയോഗിക്കാൻ തയാറായി എന്നതാണ് ഞങ്ങളുടെ ഭാഗ്യം. പൂട്ടിയതോ പൂട്ടാറായതോ ആയ സ്ക്കൂളുകൾ, മത്സ്യത്തൊഴിലാളികൾക്കു വേണ്ടിയുള്ള സമുദ്ര', കോഴിക്കോട് ബീച്ച് ചത്വരങ്ങൾ തുടങ്ങിയവ ജനശ്രദ്ധയും ദേശീയ അംഗീകാരവും ലഭിക്കത്തക്ക വിധത്തിലേക്ക് ഉയർത്താൻ IIA ക്ക് കഴിഞ്ഞു.

ഇതിന്റെ തുടർച്ചയായിരിക്കുമോ ഇനിയുള്ള രണ്ട് വർഷങ്ങൾ? തീർച്ചയായും. കേരളമൊട്ടാകെ ആർക്കിടെക്ട് സമൂഹത്തിന്റെ പ്രാധാന്യം തിരിച്ചറിയണം. ഒരു ആർക്കിടെക്ട് തന്റെ ചില്ലുമേടയിൽ നിന്ന്, സെലിബ്രിറ്റി സ്റ്റാറ്റസിൽ നിന്ന് സമൂഹത്തിലേക്ക് ഇറങ്ങിവരേണ്ടതുണ്ട്, ഇടപെടലുകൾ നടത്തേണ്ടതുണ്ട്. ഈ ചിന്താധാരയിൽ നാല് മേഖലകളിൽ കൂട്ടായ പ്രയത്നങ്ങൾക്ക് തുടക്കം കുറിച്ചു കഴിഞ്ഞു രാഷ്ട്രീയം, മാധ്യമപ്രവർത്തനം, മാനസിക ആരോഗ്യം, പാലിയേറ്റീവ് കെയർ.