രുചി പകരാൻ കുടംപുളി

ഡ്രയറിൽ ഉണക്കിയാൽ പുകച്ചുവ ഒഴിവാക്കാം

- ഡോ. സുമ ദിവാകർ

കുടംപുളി ഇട്ടു വച്ച നല്ല ചെമ്മീൻ കറിയുണ്ട്' എന്ന ചലച്ചിത്രഗാനം കേൾക്കുന്ന നോൺവെജ് മലയാളിയുടെ നാവിൽ കപ്പലോടിക്കാം. മീനിന്റെ ഉളുമ്പുനാറ്റം മാറ്റി ഒന്നാന്തരം രുചി നൽകും നമ്മുടെ കുടംപുളി. വടക്കൻ കേരളത്തിൽ കുടംപുളി ഉപയോഗം കൂടുതലായതുകൊണ്ടാകാം “മലബാർ പുളി' എന്നും കുടംപുളിക്ക് പറയാറുണ്ട്. 

കുടംപുളി മരങ്ങ ൾ സഹ്യാദ്രി മലനിരകളിലാണ് കൂടുതലായി കാണുന്നത്. കേരളത്തിൽ 3തരം കുടംപുളിയിനങ്ങളുണ്ട്. തമ്മിൽ ചെറിയ വ്യത്യാസങ്ങളേയുള്ളൂ. സാധാരണ കാണുന്ന ചെറിയ മത്തന്റെ ആകൃതിയിലുള്ള ഇനമാണ് കൂടുതലും പ്രചാരത്തിലുള്ളത്. (ശാസ്ത്രനാമം - ഗാർസിനിയ കമ്പോജിയ). അതു കഴിഞ്ഞാൽ മൂന്നാർ, രാജമല, ചിന്നാർ തുടങ്ങിയ ഉയർന്ന പ്രദേശങ്ങളിൽ മാത്രം ഉണ്ടാകുന്ന ഇനമാണ്. ഇവയ്ക്ക് ഉരുളാകൃതി കുറവായിരിക്കും (ഗാർസീനിയ കോണികാർപ്പ്). സൈലന്റ് വാലിയിലും തമിഴ്നാട്ടിലെ നീലഗിരിയിലും മറ്റും കാണുന്നത് ഗാർസീനിയ പാപ്പില എന്ന ഇനമാണ്.