വെർണയും സുൽത്താൻമാരും...

കോഴിക്കോടിന്റെ ചരിത്രത്തിലൂടെ എഴുത്തുകാരൻ അജിജേഷ് പച്ചാട്ടിന്റെ യാത്ര

- അജിജേഷ് പച്ചാട്ട്

ആരോ അരിഞ്ഞു ബാക്കിവച്ചു പോയ കരളുകൾപോലെയാണ് സത്യത്തിൽ പള്ളിക്കലിന്റെ ഭൂമിശാസ്ത്രം. തുർന്നുപോയതും തൂർന്നു തീരാത്തതുമായ എത്രയോ ക്വാറികളുണ്ട് നാട്ടിൽ. ഒരുപക്ഷേ, വർഷങ്ങൾക്കു മുൻപ് കേരളത്തിലെത്തന്നെ ആദ്യത്തെ കല്ലുവെട്ടുമെഷിനിന്റെ ശബ്ദം മുഴങ്ങുന്നതു പള്ളിക്കലിലായിരുന്നു എന്നു പറയാം. അന്നേരം, കണക്കിലും ഇംഗ്ലിഷിലുമൊക്കെ പിന്നോട്ടായ വിദ്യാർഥി എന്നനിലയിൽ വീട്ടുകാർ തള്ളിവിട്ട ട്യൂഷൻ ക്ലാസിലിരുന്നു ഞാൻ. മണിക്കൂറിൽ പത്തഞ്ഞൂറു കല്ലുകൾ വെട്ടും എന്ന കണക്കു കേട്ട് ഞങ്ങൾ കുട്ടികൾ അന്ന് അന്തംവിട്ട് ആ സംഭവം കാണാൻ പോയിട്ടുമുണ്ടായിരുന്നു.

വൈകാതെ അനുകൂല സാഹചര്യം മുതലെടുത്തു കല്ലുവെട്ടു മെഷിനുകൾ നാട്ടിൽ പെറ്റുപെരുകി. ആഴത്തിൽ ക്വാറികൾ രൂപപ്പെട്ടുവരുമ്പോൾ ചിലയിടങ്ങളിൽ ഗുഹകളും പൊത്തുകളുമൊക്കെ തെളിഞ്ഞുവരാറുണ്ട്.

അതോടെ എല്ലാവരും പറയും അതു ടിപ്പുവിന്റെ ഗുഹയാണെന്ന്. അതുകൊണ്ടുതന്നെ അന്നു പാഠപുസ്തകത്തിൽനിന്ന് ഞങ്ങൾ പഠിച്ചതിനെക്കാളും ശക്തിയിൽ ടിപ്പു വാളും അരയിൽ തൂക്കി എക്കാലവും നാട്ടിൽ യഥേഷ്ടം കറങ്ങി നടന്നിരുന്നു.

വർഷങ്ങൾക്കിപ്പുറം ഫറോക്കിൽ ടിപ്പുവിന്റെ കോട്ട കണ്ടെത്തി എന്ന വാർത്ത വന്ന അന്നുമുതൽ കാണാനുള്ള ആക്രാന്തവും പേറി ആ ചെറിയ കുട്ടി എന്റെയുള്ളിലേക്കു പൊടുന്നനെ പാഞ്ഞുവന്നു കയറിയതാണ്.

പക്ഷേ, പല കാരണങ്ങൾകൊണ്ടും അതിനു പറ്റിയില്ല എന്നു പറയാം. ഫാസ്റ്റ് ട്രാക്കിൽ നിന്നു യാത്രയ്ക്കായി വിളിക്കുമ്പോൾ അതു കൊണ്ടുതന്നെ ആദ്യം മിന്നിയത് ഫറോക്ക് ടിപ്പുവിന്റെ കോട്ടയായിരുന്നു.

ഫറോക്കിലെ ടിപ്പുവിന്റെ കോട്ട