സിങ് ഈസ് കിങ്

മികച്ച റേഞ്ച്, യൂസർ ഫ്രണ്ട്ലി, യൂട്ടിലിറ്റി ഇലക്ട്രിക് സ്കൂട്ടർ ആഗ്രഹിക്കുന്നവർക്ക് നല്ല ചോയ്സ്

- റോഷ്‌നി

കൈനറ്റിക് എന്ന പേര് കേൾക്കുമ്പോൾ ഓർമവരുന്നത് ആ പഴയ കൈനറ്റിക് ഹോണ്ട തന്നെ. ആ ഹോണ്ടയുടെ പഴയ ചങ്ങാതി കൈനറ്റിക് ഗ്രീൻ എന്ന പേരിൽ ഇ-സ്കൂട്ടർ നിർമാണത്തിലേക്കു കടന്നിട്ടു കുറച്ചു മാസങ്ങളായി. സ്റ്റാർട്ടപ്പ് കമ്പനികൾ ഒട്ടേറെ വരുമ്പോൾ പേരുകൊണ്ട് ശ്രദ്ധിക്കപ്പെടുന്ന കമ്പനിയാണ് കൈനറ്റിക് ഗ്രീൻ. റജിസ്ട്രേഷൻ, ഇൻഷുറൻസ് ആവശ്യമായ മോഡലാണ് സിങ് എച്ച് എസ്എസ്. 120 കിമീ റേഞ്ച് കിട്ടും.

 ഡിസൈൻ

കാഴ്ചയിൽ സാധാരണ പെട്രോൾ സ്കൂട്ടറുകളുടേതുപോലുള്ള രൂപ കൽപന. പഴയ യമഹ റേസി മോഡലിനോടു സാമ്യം തോന്നും. മാസ്ക് ധരിച്ചതുപോലെയാണ് സിങ് എച്ച് എസ് എസിന്റെ മുൻകാഴ്ച. വലിയ എൽഇഡി ഹെഡ്ലാംപ്, ഹാൻഡിലിൽ ആണ് ഇൻഡിക്കേറ്റർ ലൈറ്റുകൾ. സ്പീഡോമീറ്റർ, ബാറ്ററി ചാർജ് ലെവൽ, ട്രിപ് മീറ്റർ എന്നിവ അറിയാവുന്ന ഡിജിറ്റൽ കൺസോൾ. ഏതെങ്കിലും തകരാർ ഉണ്ടെങ്കിലും കൺസോളിൽ കാണിക്കും. കൺട്രോൾ സ്വിച്ചുകളെല്ലാം സാധാരണ സ്കൂട്ടറിന്റേതു പോലെ തന്നെ. ഇഗ്നിഷനിൽ കീ ഓൺ ചെയ്താൽ ആദ്യം പാർക്കിങ് മോഡിലായിരിക്കും സ്കൂട്ടർ. ഇടതു ഹാൻഡിലിൽ പാർക്ക് എന്ന ബട്ടൻ അമർത്തിയാൽ കൺസോളിൽ റെഡി എന്നെഴുതി കാണിക്കും. സിങ് ഓടാൻ റെഡിയായി എന്നർഥം.