സ്വർഗം ഭൂമിയെ തൊടുമ്പോൾ

പരിശുദ്ധ ദൈവമാതാവിന്റെ പേരിൽ ലോകത്ത് ആദ്യമായി നിർമിക്കപ്പെട്ട മരിയോ മജോരെ ബസിലിക്കയിൽ

- റോമിൽ നിന്ന് ഫാ.ജോസഫ് ഈറ്റോലിൽ

സഹസ്രാബ്ദങ്ങളുടെ ചരിത്രം അന്തിയുറങ്ങുന്ന നിത്യനഗരമായ റോമിന്റെ ഹൃദയഭാഗത്ത്, നഗരത്തിന്റെ പ്രധാന യിൽവേ സ്റ്റേഷന്റെ സമീപം അതിമനോഹരമായ ഒരു ബസിലിക്കയുണ്ട്.

അഞ്ചാം നൂറ്റാണ്ടിൽ പരിശുദ്ധ പിതാവ് സിക്സ്റ്റ്സ് മൂന്നാമൻ പാപ്പായാൽ വിശ്വാസികൾക്കായി സമർപ്പിക്കപ്പെട്ട മരിയ മജോരെ (Papal Basilica of Saint Mary Major) ദൈവാലയം. പരിശുദ്ധ ദൈവമാതാവിന്റെ പേരിൽ ലോകത്തിൽ ഏറ്റവും ആദ്യം പണിചെയ്യപ്പെട്ട ബസിലിക്കയാണിത്.

രണ്ടായിരം വർഷങ്ങൾക്കു മുൻപ് ഈശോയുടെ സുവിശേഷം രചിച്ച വിശുദ്ധ ലൂക്കാ വരച്ചെന്നു കരുതപ്പെടുന്ന പരിശുദ്ധ അമ്മയുടെ ചിത്രം ഈ ദൈവാലയത്തിലുണ്ട്. ഈ വർ ഷം സ്വർഗയാത്ര ചെയ്ത ഫ്രാൻസിസ് മാർപാപ്പയെ അടക്കിയിരിക്കുന്നതും ഈ പള്ളിയിലാണ്. പൗരാണിക പാരമ്പര്യം കൊണ്ടും ചിത്രകലാവൈഭവം കൊണ്ടും, പതിനായിരക്കണക്കിനു തീർഥാടകരെ ദിവസവും ആകർഷിക്കുന്ന ദേവാലയം. മണിക്കൂറുകൾ പുറത്തു കാത്തുനിന്നാണു പള്ളിയിലേക്ക് പലദിവസവും ആളുകൾക്കു കയറാൻ സാധിക്കുന്നത്.

ഈശോയുടെ പുൽക്കൂട്

ഈ ലോകത്തിൽ ഓരോ ദിവസവും മൂന്നരലക്ഷം കുട്ടികൾ ജനിക്കുന്നു എന്നാണ് പൊതുവിൽ കരുതപ്പെടുന്നത്. ഓരോ കുട്ടിയും ജനിക്കുമ്പോൾ ഏറ്റവും മെച്ചപ്പെട്ട സൗകര്യങ്ങൾ നൽകാനാണു മാതാപിതാക്കൾ ആഗ്രഹിക്കുന്നത്. കിടക്കാൻ വൃത്തിയുള്ള നല്ല സ്ഥലം, ഉടുക്കാൻ വെൺമയുള്ള വസ്ത്രങ്ങൾ. സാമ്പത്തികസ്ഥിതിയുടെ വ്യത്യാസങ്ങൾക്കപ്പുറം നമുക്കു സാധിക്കുന്ന ഏറ്റവും മികച്ചത് കുട്ടികൾക്കു നൽകാനാണ് എല്ലാവരും പരിശ്രമിക്കുന്നത്.

ഈശോയുടെ ജനനത്തെപ്പറ്റി വിശുദ്ധ ലൂക്കാ എഴുതുന്നത് ഇങ്ങനെയാണ്: “പേരെഴുതിക്കാനായി ഗലീലിയിലെ പട്ടണമായ നസ്റത്തിൽനിന്നു യൂദയായിൽ ദാവീദിന്റെ പട്ടണമായ ബെത്ലഹേമിലേക്ക് ഗർഭിണിയായ ഭാര്യ മറിയത്തോടു കൂടെ പോയി. അവിടെയായിരിക്കുമ്പോൾ അവൾക്കു പ്രസവസമയമടുത്തു. അവൾ തന്റെ കടിഞ്ഞുൽ പുത്രനെ പ്രസവിച്ചു. അവനെ പിള്ളക്കച്ച കൊണ്ടു പൊതിഞ്ഞു പുൽത്തൊട്ടിയിൽ കിടത്തി.