അടങ്ങുന്നില്ലേ മനസ്സ്

ബന്ധങ്ങളിൽ സ്ഥിരതയില്ലേ? ജോലിയിൽ ഉറച്ചു നിൽക്കാനാവുന്നില്ലേ? തിരിച്ചറിയാം, പരിഹരിക്കാം. ബോർഡർലൈൻ പേഴ്സണാലിറ്റി ഡിസോർഡർ

- ഡോ. വർഗീസ് പി പുന്നൂസ് പ്രഫസർ, പ്രിൻസിപ്പൽ, സൈക്യാട്രി വിഭാഗം, ഗവ.മെഡിക്കൽ കോളജ്, കോട്ടയം

ഗായിക ഗൗരിലക്ഷ്മിയുടെ തുറന്നു പറച്ചിലിലൂടെയാണു ബോർഡർലൈൻ പേഴ്സണാലിറ്റി ഡിസോർഡർ എന്ന അവസ്ഥ മലയാളികൾക്കിടയിൽ ശ്രദ്ധ നേടിയത്. കൃത്യമായ കൗൺസലിങ്ങിലൂടെ ഈ അവസ്ഥ നേരിടുകയും ജീവിതം മെച്ചപ്പെടുകയും ചെയ്ത അനുഭവം 'വനിത' യിലൂടെയാണ് ഗൗരി പങ്കു വച്ചത്.

ബോർഡർലൈൻ വ്യക്തിത്വ പ്രശ്നം നേരിടേണ്ടി വന്നവർ സോഷ്യൽ മീഡിയയിലൂടെ അനുഭവങ്ങൾ തുറന്നു പറയുന്നതും നാം കാണാറുണ്ട്. മാനസികാരോഗ്യം എത്ര പ്രധാനമാണെന്നു നമ്മെ ഓർമിപ്പിക്കുന്നുണ്ട് ആ തുറന്നുപറച്ചിലുകൾ. ബോർഡർലൈൻ പേഴ്സണാലിറ്റി ഡിസോർഡർ തിരിച്ചറിയാനും ജീവിതം മെച്ചപ്പെടുത്താനും ഈ കാര്യങ്ങൾ മനസ്സിലാക്കിക്കോളൂ.

താളം തെറ്റുന്ന വ്യക്തിത്വം

നമുക്കറിയാവുന്ന ആളുകളെക്കുറിച്ച് ആലോചിച്ചു നോക്കൂ . എല്ലാവരുടെയും വ്യക്തിത്വം ഒരു പോലെയാണോ? ഓരോരുത്തരും ചിന്തിക്കുന്ന രീതി, വികാരങ്ങൾ പ്രകടിപ്പിക്കുന്ന വിധം, പെരുമാറ്റം ഇതെല്ലാം വ്യത്യസ്തമല്ലേ. ഈ വ്യക്തിത്വത്തിൽ തകരാറുകളുണ്ടായാൽ എന്താകും സംഭവിക്കുക? ജീവിതം ബുദ്ധിമുട്ടുള്ളതാകും. ബോർഡർ ലൈൻ പേഴ്സണാലിറ്റി ഡിസോർഡർ (ബിപിഡി) അത്തരം വ്യക്തിത്വവൈകല്യമാണ്. രോഗമല്ല, തലച്ചോറിന്റെ പ്രവർത്തനങ്ങളിലുണ്ടാകുന്ന അപാകതയാണു ബിപിഡി.

പലതരം ആശങ്കകൾ, മാനസികസമ്മർദം, ഉത്കണ്ഠ ഇവ ഏറിയും കുറഞ്ഞുമെല്ലാം മനുഷ്യരിലുണ്ടാകാം. മാനസികാരോഗ്യത്തെ ബാധിക്കുന്ന ചെറിയ പ്രശ്നങ്ങളാണിവ. യാഥാർഥ്യബോധം നഷ്ടപ്പെടുന്ന തരം മാനസികപ്രശ്നങ്ങൾ ഗൗരവമുള്ളവയാണ്. ഈ രണ്ടു ഘട്ടത്തിന്റെയും ഇടയിലുള്ള അവസ്ഥയാണു ബോർഡർലൈൻ പേഴ്സണാലിറ്റി ഡിസോർഡർ.

ശ്രദ്ധിക്കണം ഈ പ്രവണതകൾ

പ്രണയത്തിലായാലും വിവാഹജീവിതത്തിലായാലും താൻ ഉപേക്ഷിക്കപ്പെടുമോ എന്ന ഭയം ബിപിഡിയുള്ളവരിൽ എപ്പോഴുമുണ്ടാകും. ഈ ആശങ്ക മൂലമുളള പെരുമാറ്റം പങ്കാളിക്കു ബുദ്ധിമുട്ടുണ്ടാക്കാനിടയുണ്ട്.