വിജയത്തിലേക്ക് 10 ചുവടുകൾ

വനിതകൾ ബിസിനസ് തുടങ്ങുമ്പോൾ ശ്രദ്ധിക്കേണ്ട പത്തു കാര്യങ്ങൾ

- കെ.കെ. ജയകുമാർ

സ്റ്റാർട്ട് ആക്ഷൻ ക്യാമറ എന്നു പറഞ്ഞാൽ സിനിമയായി എന്ന് "ചിന്താവിഷ്ടയായ ശ്യാമളയിൽ' വിജയൻ കരുതുന്നതു പോലെയല്ല ഒരു സംരംഭം. ഫാക്ടറിയോ കടയോ കുറച്ച് ജോലിക്കാരെ വച്ച് പ്രവർത്തിപ്പിച്ചാൽ വിജയിക്കും എന്ന് തെറ്റിദ്ധരിക്കരുത്. നടിക്കൊപ്പം ക്യാമറയും വെള്ളത്തിലേക്ക് ചാടട്ടെ' എന്ന അറിവേ ഉള്ളൂ എങ്കിൽ മുടക്കുമുതൽ വെള്ളത്തി ലാകും എന്ന് പ്രത്യേകിച്ച് പറയേണ്ടല്ലോ. എന്നുവച്ച് ഇത് റോക്കറ്റ് സയൻസ് ഒന്നുമല്ല. ഒരു ബിസിനസ് തുടങ്ങി വിജയിപ്പിക്കാൻ മാനേജ്മെന്റ് ഇൻസ്റ്റിറ്റ്യൂട്ടിൽ നിന്ന് എംബി എ എടുക്കുകയും വേണ്ട.

ഒരു റോസ് കമ്പ് മുറിച്ച് നട്ട് നിറയെ പൂവുകളുള്ള ചെടിയായി വളർത്തിയെടുക്കാൻ പ്രാഥമികമായ അറിവ് മാത്രം മതി. പിന്നെ, നിങ്ങളുടെ ഒരു രീതിക്ക് ആത്മാർഥമായി ശ്രദ്ധയോടെ കരുതലോടെ അങ്ങ്‌ ചെയ്യുകയല്ലേ. അതുമതി ബിസിനസിലും. ശ്രദ്ധയും കരുതലും വേണം, ചെടി തനിയേ വളര്‍ന്നോളും എന്നു വിചാരിക്കരുതെന്നു മാത്രം.

നിശ്ചയദാര്‍ഡ്യയവും ലക്ഷ്യബോധവും കഠിനാധ്വാന ത്വരയും സാമാന്യബുദ്ധിയും ഉണ്ടെങ്കില്‍ ആര്‍ക്കും വിജയിക്കാം. ബിസിനസില്‍ വിജയിച്ച വനിതകളുടെ ജീവിതം നോക്കിയാലറിയാം മിക്കവരും സാധാരണക്കാരായ സ്ത്രീകളായിരുന്നു. അവരെ വിജയത്തിലേക്ക്‌ നയിച്ചത്‌ ഇനി പറയുന്ന പത്ത്‌ കാര്യങ്ങളാണ്‌. അവ പ്രാവര്‍ത്തികമാക്കിയാല്‍ വിജയം സുനിശ്ചിതം.

1. അതിനൂതന ആശയം നിര്‍ബന്ധമില്ല

ബിസിനസ്‌ തുടങ്ങാന്‍ പറ്റിയ ആശയത്തിനുവേണ്ടി വര്‍ഷങ്ങളോളം അലയുന്നവരുണ്ട്‌. എന്നാല്‍ കണ്ണുംപൂട്ടി പാചകം ചെയ്യാനറിയുന്ന വിഭവം പോലെ സര്‍ഗ, കര്‍മശേഷി നന്നായി ഉപയോഗിക്കാവുന്ന ഏതെങ്കിലും ഒരു മേഖല നിങ്ങളുടെ മനസ്സിലുണ്ടെങ്കില്‍ അതാണ്‌ നിങ്ങളുടെ വഴി. ഏതു ബിസിനസ്സിലാണോ ആത്മവിശ്വാസത്തോടെ പ്രവര്‍ത്തിക്കാന്‍ കഴിയുന്നത്‌ ആ മേഖല കര്‍മഭൂമിയാക്കാം.