ഞങ്ങളുടെ മനസ്സിലെ അദ്ഭുതദ്വീപ്

 ഡൗൺ സിൻഡ്രം അതിജീവിച്ച് സ്വന്തം കരിയറുണ്ടാക്കിയ മൂന്നുപേരുടെ ജീവിതം കാണാം ഡൗൺ സിൻഡ്രം അവയർനെസ് മാസമായ ഒക്ടോബറിൽ

- ടെൻസി

സുഗതകുമാരിയുടെ കവിതയിലെ വരികൾ പോലെ "തിങ്കൾ തെല്ലിനു തുല്യമാമൊരു പുഞ്ചിരിയോടെ സമൂഹത്തെ ആർദ്രമായി നോക്കുന്ന മൂന്നു പേർ. "മർത്യൻ ഭാഷകളിലൊന്നിലുമല്ല, ഏതോ പക്ഷിക്കിടാവ് മുറിവേറ്റ് വിളിച്ചിടും പോൽ  അവർ നമ്മോട് മൊഴിയുന്നു. സഹതാപമല്ല, പിന്തുണയാണ് ആവശ്യം. ഇഷ്ടമുള്ള മേഖലകളിൽ മുഴുകി സ്വന്തം വരുമാനം നേടുന്നതിന്റെ സന്തോഷം പങ്കുവയ്ക്കുകയാണ് ഡൗൺ സിൻഡ്രം ബാധിതരായ മൂന്നു ചെറുപ്പക്കാരും അവരുടെ കുടുംബവും.

അമ്മാ, ഞാനൊരു മോഡലാണ്

റിസ, ആ തുണികളൊന്നു മടക്കി വയ്ക്കണേ. അമ്മ അനിതയുടെ നിർദേശത്തിനു അദ്ഭുത ഭാവത്തിൽ ഉടൻ വന്നു മറുപടി.

“വൈ ആർ യു ടോക്കിങ് ലൈക്ക് ദാറ്റ്?'' അമ്മയ്ക്ക് താൻ പറഞ്ഞതിൽ തെറ്റുണ്ടോയെന്നു സംശയമായി.

“ഞാൻ യുഎസിൽ റാംപ് വാക്ക് ചെയ്യാൻ പോകുന്ന ഒരു മോഡലല്ലേ.” ആത്മവിശ്വാസത്തിന്റെ കൊടുമുടിയിലാണ് റിസ. വെറുതേ ഒരു ദിവസം കൊണ്ടു മണൽ കൂമ്പാരത്താൽ കെട്ടിയുയർത്തിയതല്ല, ഒരു വീട് കെടാവിളക്കു പോലെ കൂടെ നിന്നു നേടിയെടുത്തതാണ് റിസയുടെ വിജയം.

ഗ്ലോബൽ ഡൗൺ സിൻഡ്രം ഫെഡറേഷൻ സംഘടിപ്പിക്കുന്ന രാജ്യാന്തര സൗന്ദര്യോത്സവത്തിലേക്ക് റിസ തിരഞ്ഞെടുക്കപ്പെട്ടിട്ടുണ്ട്. 22 മോഡലുകളെ പങ്കെടുപ്പിച്ച് അമേരിക്കയിൽ നടത്തുന്ന ഈ സൗന്ദര്യോത്സവത്തിൽ ആദ്യമായാണ് ഇന്ത്യയിൽ നിന്ന് ഒരാൾക്ക് പങ്കെടുക്കാൻ അവസരം ലഭിക്കുന്നത്.

“നേരെ വാ നേരെ പോ മട്ടുകാരിയാണ് റീസു. ആരെയും പേടിയില്ല. 'റിസയുടെ അമ്മ അനിത പറയുന്നു. “അവളുടെ അഭിപ്രായം ആരുടെ മുന്നിലും പറയും. റീസുവിന്റെ സഹോദരി റേയ മുംബൈയിലാണ് ജോലി ചെയ്യുന്നത്. റീസു വിഡിയോ കോൾ ചെയ്യുമ്പോൾ ചിലപ്പോൾ അവൾക്ക് ജോലി തിരക്കു കാരണം എടുക്കാൻ സാധിക്കാറില്ല. തിരികെ വിളിക്കുമ്പോൾ റീസു ചോദ്യം ചെയ്യും. എന്റെ ബോസ് സമ്മതിച്ചില്ല റീസു' എന്നു പറഞ്ഞു റേയ തടിതപ്പും. "ബോസിന്റെ നമ്പർ തരൂ. ഞാൻ വിളിച്ചു പറയാം. കോൾ വരുമ്പോൾ എടുക്കുന്നതിൽ പ്രശ്നമുണ്ടാക്കരുതെന്ന് അതാണ് റിസ.” അനിത പൊട്ടിച്ചിരിച്ചു.

ഹൃദയത്തിൽ വന്നു കയറുന്ന സ്നേഹം