കണക്കിന്റെ മാധുര്യം

ഗണിതശാസ്ത്രവും എഴുത്തും സമന്വയിപ്പിക്കുന്ന സാഹിത്യ സമീപനത്തി ലൂടെ മലയാളത്തിൽ സമാനതകളില്ലാത്ത ഒരു ദൗത്യം വിജയപഥത്തിൽ എത്തിച്ച പളളിയറ ശ്രീധരന്റെ സംഭാവന നിർണ്ണായകമാണ്.

- സജിൽ ശ്രീധർ

എല്ലാവരും സഞ്ചരിക്കുന്ന വഴിയേ അവരുടെ നിഴൽപറ്റി പോകാൻ ആർക്കും കഴിയും. മുൻപേ നടക്കുന്നവരുടെ കാൽപ്പാടുകളാണ് ഇത്തരം പിൻനടത്തക്കാരുടെ പ്രചോദനം. എന്നാൽ മറ്റാരും സഞ്ചരിക്കാത്ത ഇടങ്ങളിലൂടെ തനിച്ച് നടക്കുകയും സവിശേഷമായ വ്യക്തിമുദ്ര പതിപ്പിക്കുകയും ചെയ്യുന്നത് ചെറിയ കാര്യമല്ല. വളരെ അപൂർവം ചിലർക്ക് മാത്രം കരഗതമായ ഒരു പ്രതിഭാസമാണിത്. മലയാളത്തിൽ അത്തരമൊരു അപൂർവതയുടെ പേരാണ് പളളിയറ ശ്രീധരൻ,

അടിസ്ഥാനപരമായി ഗണിതശാസ്ത്രദ്ധ്യാപകനായിരുന്നു   അദ്ദേഹം. എന്നാൽ സാഹിത്യവാസന രക്തത്തിൽ അലിഞ്ഞ ഒരാൾ. കണക്കും സാഹിത്യവും വിരുദ്ധദിശയിൽ നിൽക്കുന്ന കാര്യങ്ങളെന്നാണ് പൊതു സങ്കൽപ്പം. എന്നാൽ ഇത് രണ്ടിനെയും എങ്ങനെ സമർത്ഥമായി സമന്വയിപ്പിക്കാമെന്ന് അനുഭവത്തിലൂടെ മലയാളിയെ ബോധ്യപ്പെടുത്തിയ മഹാനുഭാവനാണ് പളളിയറ ശ്രീധരൻ മാഷ്.

ഗണിതസംബന്ധിയായ 150-ൽ അധികം പുസ്തകങ്ങൾ രചിച്ച അദ്ദേഹത്തിന്റെ ജീവിതവഴികൾ ആദ്യം പരിശോധിക്കേണ്ടതുണ്ട്.

ഗണിതശാസ്ത്രത്തിലും അദ്ധ്യാപനത്തിൽ ബിരുദമെടുത്ത പളളിയറ ദീർഘ കാലം അദ്ധ്യാപകനായി ജോലി നോക്കിയിരുന്നു. എന്നാൽ സർവീസ് പൂർത്തിയാക്കാൻ അദ്ദേഹം കാത്തുനിന്നില്ല. യാന്ത്രികമായ ഒരു ജോലിയിൽ മാത്രമായി ഒതുങ്ങാനുള്ള തന്റെ കർമ്മകാണ്ഡമെന്നും അതിനപ്പുറം സർഗാത്മകമായും ക്രിയാത്മകമായും ഒരുപാട് കാര്യങ്ങൾ ചെയ്യാനുണ്ടെന്ന തിരിച്ചറിവിന്റെ വഴിയിലാണ് പ്രതിഭാധനനായ അദ്ദേഹം അദ്ധ്യാപനത്തോട് പാതിവഴിയിൽ വിട പറയുന്നത്.

1999-ൽ ജോലി യിൽ നിന്നും സ്വയം വിരമിച്ചു. പിന്നീട് പൂർണ്ണമായും ഗ്രന്ഥരചനയിൽ മുഴുകി.