வகை வகையாய் வாரிசுகள்!

தேர்தல் என்றாலே பரபரப்புக்கு பஞ்சம் இருக்காது.

- பரிதி

ஊர்க்கதை பேசுகிறவர்கள் யார் கதையாவது கிடைக்காதா என்று அலைவதுபோல், அரசியல் சூழ்நிலையை பேசுவதற்கு தற்போதைக்கு பீகார் தேர்தல் தான் எல்லோருக்கும் கிடைத்திருக்கிறது. இந்திய அரசியலின் டிரெண்டுக்கு ஏற்ப இங்கும் வாரிசு வேட்பாளர்கள் வரிசை கட்டி நிற்கின்றனர். ராஷ்டிரிய ஜனதாதள நிறுவனர் லாலுபிரசாத் யாதவின் மகனும், முன்னாள் துணை முதல்வருமான தேஜஸ்வி யாதவ் ரகோபூர் தொகுதியில் மீண்டும் களமிறங்குகிறார்.

பா.ஜனதா சார்பில் தாராபூர் தொகுதியில் துணை முதல்வர் சாம்ராட் சவுத்ரி நிற்கிறார். அவரது தந்தை சகுனி சவுத்ரி ஏழு முறை எம்.எல்.ஏ. மற்றும் எம்.பி.யாக இருந்துள்ளார், அமைச்சராகவும் பணியாற்றி உள்ளார். தாய் பார்வதி தேவி, தாராபூர் தொகுதியில் எம்.எல்.ஏ.வாக இருந்துள்ளார்.

இவருக்கும் நம் பிரதமருக்கு போல் கல்வி சான்றிதழில் வில்லங்கம் இருக்கிறது. அடிப்படை கல்வியை முடித்த பிறகு, அவர் மதுரை காமராஜ் பல்கலைக்கழகத்தில் (ஆம், நம் பல்கலைக்கழகத்தில் தான்) உயர் கல்வியை பெற்றதாக கூறியுள்ளார். இதில் தான் சர்ச்சையே எழுந்துள்ளது. அவரே சில சமயங்களில் தனது பிரமாணப் பத்திரத்தில் 7-ஆம் வகுப்பு வரை மட்டுமே படித்ததாக காட்டுகிறார்.

பிறகு எப்படி பல்கலைக்கழகத்திற்கு செல்ல முடியும்? என்ற கேள்வி பிரதானமாக உள்ளது.

தேர்தலில் முறைகேடு, ஆள்மாறாட்டம், அதிகாரி உத்தரவை மீறுதல் உள்ளிட்ட பல குற்றச்சாட்டுகள் அவர் மீது உள்ளன.

மேலும் ஜன் சுராஜ் அமைப்பின் நிறுவனரும் தேர்தல் வியூக அமைப்பாளருமான பிரசாந்த் கிஷோர், '1995-ஆம் ஆண்டு தாராபூரில் ஏழு பேர் கொல்லப்பட்ட கொலை வழக்கில் சாம்ராட் சவுத்ரி குற்றம் சாட்டப்பட்டவர். அவரை உடனடியாக கைது செய்ய வேண்டும்' என்று கோரிக்கை விடுத்துள்ளார்.

“ஏழு பேரை கொன்றதாக குற்றம் சாட்டப்பட்ட வழக்கில், சம்பவ காலகட்டத்தில் தான் மைனர் என்பதை நிரூபிக்க, பிறந்த வருடம் 1981 என காட்டும் பள்ளி அனுமதிச் சீட்டை சமர்ப்பித்தார். அதன்படி சம்பவம் நடந்த 1995-இல் அவருக்கு 15 வயது. ஆனால், 2020 தேர்தல் பிரமாணப் பத்திரத்தில் அவரது வயது 51 என குறிப்பிடப்பட்டு இருந்ததை பார்க்கும்போது, 1995-இல் அவருக்கு 26 வயது இருக்கும். எனவே, கொலைக் குற்றம் சாட்டப்பட்ட இவர் அரசியலமைப்புச் சட்டப் பதவியிலிருந்து நீக்கப்பட்டு சிறையில் இருக்க வேண்டும்” என்று அவர் வாதிடுகிறார்.