ഇളനീർ ഈസ് ദി സീക്രെട് ഓഫ് മൈ എനർജി

ഇളനീരാണ് ബാലകൃഷ്ണൻ ജീവൻ ടോൺ. കൊളസ്ട്രോളും ഷുഗറും പ്രഷറും തുടങ്ങി ജീവിത ശൈലീരോഗങ്ങൾക്കൊന്നും ഈ ശരീരത്തിൽ സ്ഥാനമില്ല

- സൂരജ് സുകുമാരൻ

ഇളനീർ മാത്രം കഴിച്ച് ജീവിക്കുന്നൊരു മനുഷ്യനുണ്ട്, അങ്ങ്...! “ഓ, പിന്നേ...അങ്ങനെയൊക്കെ ജീവിക്കാൻ പറ്റുമോ..?'' സംഗതി കേട്ടാൽ ഇത്തരത്തിലൊരു നൂറായിരം സംശയങ്ങളുമായി പലരും പിന്നാലെ കൂടിയെന്നിരിക്കും. “എല്ലാവർക്കും പറ്റില്ല, ചിലർക്ക് പറ്റും “എന്നാലും...?'' ഉയർന്നു വന്ന സംശയങ്ങൾക്കെല്ലാം മറുപടി തേടി കാസർഗോഡ് ജില്ലയിലെ ചന്തേരയിലേക്കൊരു യാത്ര. കണ്ണൂർ ജില്ലയുടെ അതിർത്തിയായ കരിവെള്ളൂരും പിന്നിട്ട് കാസർഗോഡിന്റെ സ്വാഗതകവാടമായ കാലിക്കടവിലെത്തി. റോഡരികിലെ മൈതാനത്ത് ഒരുകൂട്ടം യുവാക്കൾ കായികപരിശീലനം നടത്തുന്നുണ്ട്. ആ കൂട്ടത്തിന്  ഒത്ത നടുവിൽ കാലിൽ മുറുക്കി കെട്ടിയ ഫുട്ബോൾ ബൂട്ടും ജർമൻ ക്ലബ് ബൊറൂസിയ ഡോർട്ട്മുണ്ടിന്റെ ജേഴ്സിയുമായി ചുറുചുറുക്കോടെ അവരെയെല്ലാം നിയന്ത്രിക്കുന്നൊരു അറുപതുകാരൻ. വണ്ടിയിൽ നിന്നിറങ്ങി റോഡരികിലുണ്ടായിരുന്ന നാട്ടുകാരനോട് സംഭവം ചോദിച്ചപ്പോൾ മറുപടി ഇങ്ങനെ “നിങ്ങൾ അന്വേഷിച്ച് വന്ന അതേ ബാലകൃഷ്ണൻ പാലായി തന്നെ ആണിത്, വ്യത്യസ്തനാമൊരു ബാലൻ...'' “ആളൊരു കില്ലാഡി തന്നെ' എന്ന് മനസ്സിൽ പറഞ്ഞ് നേരെ മൈതാനത്തേക്കിറങ്ങി പരിചയപ്പെട്ടു. “ബാലേട്ടാ, ഇളനീർ കുടിക്കൊപ്പം കായിക പരിശീലനവുമുണ്ടോ...?'' “ഇനി എന്തൊക്കെ കാണാനിരിക്കുന്നു, നിങ്ങള് കൂടെ പോര്.'' നാട്ടിടവഴികളിലൂടെ ബാലേ ട്ടന്റെ സൈക്കിൾ നീളത്തിലോടി, പിറകെ ഞങ്ങളും. അധികം ദൂരം പോവേണ്ടി വന്നില്ല, വീടിന്റെ തണലിൽ സൈക്കിളിന്റെ ബ്രേക്ക് വീണു.

അങ്ങനെയാണ് ഇങ്ങനെയായത്.....

ഫുട്ബോളിന്റെ തട്ടകമായ തൃക്കരിപ്പൂരിലെ എടാട്ടുമ്മലിലാണ് ബാലകൃഷ്ണൻ വളർന്നത്. അതിനാൽ തന്നെ ചെറുപ്പം മുതൽ കാലിൽ ബൂട്ട് കെട്ടി സെവൻസ് ഫുട്ബോൾ മൈതാനങ്ങളിൽ ത്രസിപ്പിക്കുന്ന പ്രകടനം നടത്തി. സർക്കാർ സർവീസിൽ കയറിയ ബാലകൃഷ്ണൻ കണ്ണൂർ കലക്ട്രേറ്റിൽ ജോലി ചെയ്യുന്ന കാലത്ത് 35-ാം വയസ്സിലാണ് അന്നനാളത്തിന് ഗുരുതരമായ അസുഖം ബാധിച്ചത്. ആ അസുഖമാണ് തന്റെ ജീവിതത്തെ കീഴ്മേൽ മറിച്ചതെന്ന് അദ്ദേഹം പറയുന്നു.