பீஜிங்கில் ஊடக அருங்காட்சியம்; ஊடகத்தின் வரலாற்றிலும் நவீனத்திலும் வாழ்ந்த அனுபவம்

2025ஆம் ஆண்டின் ஜுன் மாதம் அது. சீனத் தலைநகர் பீஜிங்கில் வசந்தகாலம். வேளையோடு பொழுதுபுலந்த அந்த அழகான காலையில் பனிக்குளிர் விலகியிருந்தது. ஊடக வரலாற்றை அறிந்துகொள்வதற்கு வாய்ப்பு கிடைத்தது. அது சீனாவை மையப்படுத்திய ஊடக வரலாறு என்பது தான் மனக்கோட்டை ஆனால் நிஜத்தில் மறுபட்டதாக இருந்தது.

- 

பீஜிங்கின் சாங்டீ மாவட்டத்தில் Communication University of China அமைந்திருக்கின்றது. அந்த பல்கலைக்கழகத்தின் வளாகத்தில் தான் ஊடக அருங்காட்சியம் அமைந்திருக்கிறது. பல்கலைக்கழக நிர்வாகத்தினால் தான் ஊடக அருங்காட்சியகம் நிர்வகிக்கப்படுகிறது.

எமது அழைப்பாளர்கள் நேரத்தை முன்பதிவு செய்திருந்ததினால் சிரமமின்றி உள்ளே நுழைய முடிந்தது. சதாரணமாக ஊடகத்துறை மற்றும் தொடர்பாடல்துறையினை மையப்படுத்தி சர்வதேச பார்வையாளர்களுக்கான அனுமதி காலை 9 மணி முதல் மாலை 5 மணி வரை வழங்கப்படுகிறது.

குறிப்பாக, தொடர்பாடல்துறை, ஊடகத்துறை மாணவர்களுக்கு விசேட சலுகை கட்டணமும் காணப்படுகின்றது. இதனைவிடவும் வெளிநாடுகளில் இருந்து வருகை தருபவர்களுக்கு விசேட வழிகாட்டியும் பணிக்கு அமர்த்தப்படுகின்றார். அவர் ஊடக அருங்காட்சியகம் பற்றி விளக்கமளிப்புக்களைச் செய்கிறார்.

சீன மொழி அறியாத எனக்கு ஆங்கில வழிகாட்டியுடன் கூடவே டிஜிட்டல் வரைபடத்தையும் வழங்கினார்கள். மியூசியத்தில் உள்ள 'கியூஆர்' குறியீடுகளை ஸ்கேன் செய்வதன் மூலம் ஒவ்வொரு பொருளின் வரலாறு, பயன்பாடு, முக்கியத்துவம் குறித்த விளக்கத்தை தொலைபேசியில் ஆங்கில மொழியில் பெற்றுக்கொள்வதற்கான வசதிகளும்காணப்படுகின்றன.

பல்வேறு பிரிவுகளைக் கொண்ட அருங்காட்சியகத்தில் வரலாற்று ஊடக பகுதியே முன்னிலையில் உள்ளது. அப்பகுதிக்குள் பிரவேசித்தவுடன் முதலாவது சீன பத்திரிகையின் நகல் காணப்படுகிறது. 'Shen Bao' என்று அழைக்கப்பட்ட அந்த பத்திரிகை, 19ஆம் நூற்றாண்டில் ஷாங்காயில் வெளியானதாக வரலாறு கூறுகிறது. அதன் அருகே அச்சுக்கோர்ப்புக்கள், கையெழுத்திலான செய்தி தாள்கள், பழைய உலக பொருட்களை பயன்படுத்திய எழுதிய செய்தித் தாள்கள் என்று நீண்ட பட்டியலொன்று காணப்பட்டது.