ప్రేమంటే?

ఆమె ప్రేమించింది. తల్లిదండ్రులను ఎదిరించి పెళ్లాడింది.

- ఎన్.బి.సుధాకర్ రెడ్డి

ఆమె ప్రేమించింది. తల్లిదండ్రులను ఎదిరించి పెళ్లాడింది. ప్రేమకు చదువు, కుటుంబ నేపథ్యం, కులం, మతం అడ్డు కాదని లోకానికి చాటింది. అయితే దొంగతనం కేసులో భర్తను పోలీసులు అరెస్టు చేయడంతో మనస్తాపం చెందింది. అవమానం భరించలేక ఐదేళ్లు, నాలుగేళ్లు వయసున్న ఇద్దరు కూతుళ్లను చంపి తాను ఉరేసుకుని చనిపోయింది.

ఈ సంఘటన తెలంగాణ రాష్ట్రం, ఖమ్మం జిల్లాలో చోటుచేసుకున్నది. ఆమె తల్లిదండ్రులు ఇద్దరు లెక్చరర్లు.ఆమె భర్త కుటుంబం కూలీనాలీ చేసుకుని బతికేది. ఆమె ఎంటెక్ చదివింది, అతను డిగ్రీ చదివాడు. ప్రేమ ఇద్దరి మతాలు వేరు. ఇద్దరికీ రైలు ప్రయాణంలో పరిచయం అయ్యింది. కోచింగ్ సెంటర్లో ఇద్దరి మధ్య ప్రేమ మొగ్గ తొడిగింది. పెద్దలను ఎదిరించి ఆమె పెళ్లాడింది. 35 ఏళ్ల వయస్సుకే తన జీవితాన్ని బుగ్గిపాలు చేసుకున్నది. పెళ్లయిన ఆరేళ్లకే వివాహ బంధం ముగిసిపోయింది. తెలంగాణ రాష్ట్రం మీర్పేటలో ఒక వ్యక్తి తన భార్యను చంపి, ముక్కలుగా కోసి కుక్కర్లో ఉడికించాడు. ఆధారాలు లేకుండా చేస్తే పోలీసులు తనను ఏమీ చేయలేరని భావించాడు. వివాహేతర బంధం వివాదానికి దారి తీయడంతో ఈ దారుణానికి పాల్పడ్డాడు.భార్యను గుట్టుచప్పుడు కాకుండా చంపేసి, ప్రేయసిని పెళ్లాడాలన్న తపన అతన్ని కిరాతకుడిగా మార్చింది. తన ప్రియురాలు తన ఇద్దరు పిల్లలను తల్లిలా చూసుకుంటుందని ఆశించాడు. ఇప్పుడు ఆ ఇద్దరు పిల్లలను వేదనకు గురి చేశాడు.నిందితుడిగా పోలీసులకు బందీగా మారి బతుకుజీవుడా! అంటున్నాడు.

ఆంధ్రప్రదేశ్ రాజమండ్రిలో 68 ఏళ్ల వృద్ధురాలు 64 ఏళ్ల వృద్ధుడిని పెళ్ళాడింది. వారిద్దరు ఒక వృద్ధాశ్రమంలో శేషజీవితం గడుపుతున్నారు. కొన్నాళ్ల క్రితం అతను పక్షవాతానికి గురయ్యాడు. ఆమె మానవత్వంతో ఆయనకు సపర్యలు చేసింది. దీనితో ఆయన ఆరోగ్యం కుదుటపడింది.ఆయన ఆమెను ఇష్టపడి తనకు తోడుగా ఉండమని కోరాడు.ఆమె దాతృత్వంతో ఆయన కోరికను మన్నించింది.

వృద్ధాశ్రమంలోని పెద్దల సమక్షంలో దండలు మార్చుకుని వారిద్దరూ దంపతులు అయ్యారు.