சிறுவர் பாதுகாப்பும் சமூக மயமாக்கலும்

சிறுவர்கள் வளர வளர அவர்களின் பாதுகாப்பும் அதிகரித்துக்கொண்டே வருகிறது. ஒவ்வொரு பிள்ளையும் வெவ்வேறான சமூகத்தில் குடும்பத்தில் வளர்கின்றதுடன், இன்றைய காலத்தில் சிறுவர்கள் பல அச்சுறுத்தல்களுக்கும் சவால்களுக்கும் ஒவ்வொரு நிமிடமும் முகங்கொடுத்துக்கொண்டே வருகின்றனர். 18 வயதுக்கு உட்பட்ட அனைவரும் சிறுவர்களாகக் கருதப்படுகின்றனர். இவ்வாறான அச்சுறுத்தல்களில் இருந்து தங்களைப் பாதுகாக்கச் சிறுவர்களிடையே தற்பாதுகாப்பு தொடர்பான சமூக மயமாக்கல் அவசியமானதாகக் காணப்படுகிறது.

- தி.திலோஷினி, 4ஆம் வருட சிறப்புக் கற்கை மாணவி, கல்வி, பிள்ளை நலத்துறை, கிழக்குப் பல்கலைக்கழகம்.

இவ்வாறான அச்சுறுத்தல்களும் சவால்களும் துஷ்பிரயோகம் என்ற வடிவில் சிறுவர்களை அணுகுவதாகக் காணப்படுகிறது. சிறுவர் எனும் பொழுது ஆண்-பெண் ஆகிய இரு பாலினத்தவரையும் குறிப்பதாக உள்ளதுடன், சிறுவர் துஷ்பிரயோகம் என்பது ஒரு பெற்றோர், பராமரிப்பாளர் அல்லது நம்பிக்கைக்குரிய ஒரு நபரால் சிறுவருக்குத் தீங்கு விளைவிக்கும் அச்சுறுத்தலுக்கு வழிவகுக்கும் எந்தவொரு செயலையும் அல்லது சிறுவருக்கான தேவைகளை நிறைவேற்றாது கவனிக்காமல் விடுதலையும் குறிக்கின்றது. இது உடல் ரீதியான துஷ்பிரயோகம், உணர்ச்சி ரீதியான துஷ்பிரயோகம், பாலியல் துஷ்பிரயோகம், புறக்கணிப்பு மற்றும் சுரண்டல் உள்ளிட்ட பல்வேறு வடிவங்களில் நிகழ்கிறது. இவ்வாறான துஷ்பிரயோகங்கள் பல சந்தர்ப்பங்களில் பல சூழல்களில் பிள்ளைகளைத் தாக்குவதாக அமைகின்றது. உதாரணமாக குடும்பம், பாடசாலை, சமூக மையங்கள் போன்றவற்றில் இடம்பெறுகிறது.

அதாவது வீட்டினைப் பொறுத்தவரையில் பெற்றோர்கள் பிள்ளைகளுக்கு அடித்தல், வலுக்கட்டாயமாக வேலைக்கு அனுப்புதல், பாடசாலைக்கு அனுப்பாமல் வீட்டு வேலைகள் செய்ய வைத்தல் போன்றனவும், பெற்றோர் வேலைக்கு வெளிநாட்டிற்குச் செல்லும்போது, உறவினர்கள் பிள்ளைகளை அதிக வேலை செய்ய பணித்தல், அடித்தல், சூடு வைத்தல், பாலியல் வற்புறுத்தல்கள் போன்ற பல துஷ்பிரயோகங்கள் நிகழ்கின்றன.

அதுமட்டுமின்றி, பிள்ளைகள் பாதுகாப்பாகக் கருதும் அவர்களை வழிப்படுத்தும் இடமாகக் காணப்படும் பாடசாலையினைப் பொறுத்தவரையில் சில ஆசிரியர்கள் பிள்ளைகளுக்கு காதுகளைத் துருவுதல், உடலில் காயம் ஏற்படும் வண்ணம் அடித்தல், பாலியல் தொல்லைகள் அளித்தல், பிள்ளைகளை மிரட்டல், உணர்வு ரீதியான துஷ்பிரயோகம் போன்ற சம்பவங்களும் நிகழ்ந்த வண்ணமே உள்ளதுடன் சமூக அமைப்புக்களைப் பொறுத்தவரையில் தனியார் வகுப்புக்கள், மத ஸ்தாபனங்கள் போன்றவற்றில் சில முறையற்ற நபர்களினூடாக சிறுவர்கள் பாலியல் ரீதியான வன்புணர்வுக்கும், தவறான தொடுகைகளுக்கும், மிரட்டல்களுக்கும், கடத்தல்களுக்கும், சில சிறுவர்கள் யாசகம் எடுப்பதற்கும் ஆளாகின்ற பல சம்பவங்கள் காணப்படுகிறன. இதனால் சிறுவர்கள் வெளியில் கூறுவதற்குப் பயந்து தற்கொலை செய்துகொள்கின்ற சம்பவங்களும் பதிவாகின்றன. இச்செயற்பாடானது பூவொன்று காயாக முதல் பறித்துக் கசக்கப்படுவதாகக் காணப்படுகிறது.