நாம் இழந்த தமிழர் நகரம்; பூப்பாறை!

தனுஷ்கோடியிலிருந்து கொச்சி செல்லும் தேசிய நெடுஞ்சாலையில் தமிழக எல்லையான போடி மெட்டிலிருந்து பதினோராவது கி.மீ-ல் அழகுற அமைந்திருக்கும் ஒரு மலைக்கிராமம்தான் பூப்பாறை. TATAவும், Harrison Malayalam Limited-ம் பல்லாயிரக்கணக்கான ஏக்கர்களை வளைத்துப்போட்டு உருவாக்கியிருக்கும் தேயிலைத் தோட்டங்களால் பூப்பாறையைச் சுற்றி எங்கு பார்த்தாலும் ஒரே பசுமைதான். குமுளியிலிருந்து மூணாறு செல்லும் சாலையையும், போடியில் இருந்து மூணாறு செல்லும் சாலையையும், மையப் பகுதியில் இணைக்கும் இந்தப் பூப்பாறை, முன்னொரு காலத்தில் கொட்டக்குடி ஜமீன்தார் வசம் இருந்த ஒரு பகுதி.

- ~பென்னிகுக் பாலசிங்கம்.

இரவு நேரங்களில் பத்து மணியைக் கடந்து நீங்கள் மூணாறு செல்வதாக இருந்தால், கண்டிப்பாக பூப்பாறையில் கட்டன் சாயாவை குடிக்காமல் கடந்து போக முடியாது. அதிலும் பொடிச் சாயாவின் சுவையே தனி. யாரேனும் குமுளியிலிருந்து மூணாறு செல்வதாக இருந்தால்கூட வழி பூப்பாறைதான் என்பதால் இரவும் பகலும் வாகனப் போக்குவரத்து இருந்துகொண்டே இருக்கிறது.

இந்த அழகிய மலைக்கிராமத்தின் பேச்சுமொழி 1995 வரை தமிழ்தான். யாராவது மலையாளிகள் பூப்பாறையைக் கடக்கும்போது மலையாளம் பேசிக்கொள்வார்கள். மற்றபடி தமிழும் தமிழர்களும் ஈருடல் ஒருயிராகப் பின்னிப்பிணைந்து கிடந்த இந்தப் பூப்பாறையில் இன்றைக்கு மலையாள ஆதிக்கம் கொடிகட்டிப் பறக்கிறது. இன்றைக்கு ஐம்பது வயதை நெருங்குகிறவர்களின் காதல் பூந்தோட்டமாக இருந்த பகுதிதான் இந்தப் பூப்பாறை.

1970களில் ஆரம்பித்தது மலையாளக் குடியேற்றம். அதுவரை பூப்பாறையைச் சுற்றிக் கிடந்த அத்தனை ஏலக்காய்த் தோட்டங்களும் தமிழர்களிடத்திலேயே இருந்தது. வீடு வாசலும் அவர்களுடையதே. ஒரு சுதந்திர வாழ்க்கையின் சொர்க்கத்தைச் சொந்தமாய் அனுபவித்துக்கொண்டிருந்தார்கள்.

தாலுகா உடும்பஞ்சோலையாக இருந்தாலும் பூப்பாறை ஒரு தனித்த தேசமாகவே காட்சியளித்தது. பழைய பெரியகுளம் தாலுகாவை அவ்வளவு சீக்கிரம் அவர்கள் மறந்துவிடத் தயாரில்லை. 1956ல் பண்டித நேரு அரசாங்கத்தால் நடத்தப்பட்ட மொழிவழிப் பிரிவினை எனும் மோசடி பூப்பாறையை எந்த விதத்திலும் பாதிக்கவில்லை. காரணம் அன்றிலிருந்து இன்றுவரை பூப்பாறையின் மொத்தத் தொடர்பும் போடி நகரோடுதான் இணைந்து கிடக்கிறது. பிழைப்பிற்காக வந்த மலையாளிகளுக்கும் போடியே வணிகத்தலம். 1970 வரை 90 விழுக்காடு தமிழர்கள் மட்டுமே வாழ்ந்த இந்தப் பூப்பாறையின் இன்றைய வரலாறு வேறு.