Bek-en-klou knou beesboere

'n Positiewe geval van bek-en-klouseer (BKS) is verlede week op 'n eiendom in die omgewing van Gouda bevestig nadat 'n boer in die Vrystaat op 1 November simptome van dié siekte by sy kudde opgemerk en aangemeld het.

- Charlotte Lesch

Die gebeure kom nadat die beeste onlangs vanuit die Gouda-omgewing na die betrokke plaas in die Vrystaat vervoer is. Veeartsenydienste is ontbied, wat die boer se plaas in kwarentyn geplaas het. "Gedurende verdere ondersoek het veeartse mondletsels by die beeste opgemerk," bevestig dr. Lesley van Helden, staatsveearts by die Wes-Kaap se departement van landbou.

Bek-en-klouseer is kort daarna in 'n laboratorium bevestig nadat monsters vir toetse gestuur is.

"Alle eiendom met gekloofde hoefdiere binne 'n 10 km radium van die uitbraak, is onder kwarentyn geplaas. Inspeksies en toesig word tans op die betrokke plase uitgevoer, voeg sy by. Twee addisionele eiendomme in Velddrif en Bredasdorp wat kuddes na die betrokke eiendom in Gouda gestuur het, is intussen ook onder kwarentyn geplaas en word ondersoek.

Alle plase wat onlangs in kontak met die betrokke vee-vervoermaatskappy was, word ook opgevolg. Agri Wes-Kaap en die Rooivleis Produsente-organisasie (RPO) Wes-Kaap bevestig dat daar 'n omvattende operasionele plan saamgestel is in samewerking met die Wes-Kaapse departement van landbouveeartseny (DWLK) om die huidige bek-en-klouseer situasie (BKS) in die Gouda-area te bestuur.