Plaaslike boere skerp biosekuriteit op

Boere moet nou meer as ooit paraat wees en sorg dat hul biosekuriteitsmaatreëls in plek is, sê dr. Muller Strydom van die George-dierehospitaal, na aanleiding van die bek-en-klouseer-uitbreking in die Gouda-omgewing.

- Alida de Beer

Die geval is op Vrydag 7 November deur die Wes-Kaapse Veeartsenydienste bevestig.

"Ons is baie bekommerd en teleurgesteld. Gelukkig is daar vinnig opgetree. Dit beklemtoon net weer die dringendheid om almal van belang op 'n gereedheidsvlak te kry.

"Ek is besig om kontakbesonderhede van alle belanghebbendes bymekaar te kry sodat almal dadelik gemobiliseer kan word in geval ons 'n uitbreking hier kry."

Volgens die Wes-Kaapse departement van landbou is die Gouda-plaas onder kwarantyn saam met twee ander eiendomme in die Velddrifen Bredasdorp-omgewing vanwaar die beeste vermoedelik na Gouda verskuif is. Alle eiendomme met gespletehoefdiere binne 'n 10 km-radius van die geaffekteerde gebied is ook onder kwarantyn geplaas en ondersoeke en monitering deur veeartsspanne duur voort.

Henry Meyer, Tuinroete-verteenwoordiger van Agri SA, het by navraag gesê Agri Wes-Kaap het al verlede jaar begin voorberei vir moontlike uitbrekings. "Ons wil elke boer versoek om hulle eie biosekuriteit op te skerp.