Loslootjie vir Top 8-spelers

Met die Top 8-klubkompetisie wat dié komende naweek 'n loslootjie het, sal die deelnemende spelers - en natuurlik hul ondersteuners - sekerlik daarna uitsien hoe die Springbokke in Kaapstad rugby speel wat die reuk van verlede naweek se brouwerk teen Australië verdryf.

- Hugo Redelinghuys

Dalk wyk Rassie Erasmus af van sy "nuwe spelpatroon" en laat hy die spelers toe om régte Springbokrugby te speel. Saterdag se toets in die Kaapstad-stadion is nou 'n gulde kans vir die Bokke om hul ondersteuners met 'n oortuigende oorwinning terug te betaal.

Op die plaaslike rugbyfront het twee klubwedstryde darem opgemaak vir die Bokke se getjommel. In Oudtshoorn was Evergreens en Bridgton in 'n titaniese stryd betrokke met Evergreens wat uiteindelik naelskraap met 33 - 31 aan die wenkant was.

Met dié oorwinning het Pacaltsdorp se spogspan wéér 'n vyfpunter behaal en gee hy steeds die pas aan in die Top 8-kompetisie met 48 punte.