இந்தியாவுடன் சிறப்பான நட்புறவு; வரி விதிப்பு மட்டுமே பிரச்னை

இந்தியாவுடன் அமெரிக்க நட்புறவு சிறப்பாக உள்ளது. ஆனால், அமெரிக்க பொருள்களுக்கு இந்தியா தொடர்ந்து பல ஆண்டுகளாக அதிக வரி விதித்து வருவதால் பிரச்னையாக உள்ளது என்று அமெரிக்க அதிபர் டொனால்ட் டிரம்ப் தெரிவித்துள்ளார்.

- 

நியூயார்க், செப். 3:

அமெரிக்கா இந்திய பொருள்கள் மீது 50 சதவீத வரி விதித்ததையடுத்து, சீனா, ரஷ்யாவுடன் இந்தியா நெருக்கத்தை அதிகரித்துள்ளது. இதையடுத்து, ரஷ்யா, சீனா போன்ற நாடுகளுடன் இந்தியா நெருக்கம் காட்டுவது பிரச்னைக்குரியது. அமெரிக்கா, ஐரோப்பிய நாடுகள், உக்ரைனுடன்தான் மிகப்பெரிய ஜனநாயக நாடான இந்தியா தோழமை கொள்ள வேண்டும் என்று அதிபர் டிரம்ப்பின் மூத்த வர்த்தக ஆலோசகர் பீட்டர் நவாரோ கூறினார்.

வரி தளர்வு?: இந்நிலையில் வெள்ளை மாளிகையில் செவ்வாய்க்கிழமை செய்தியாளர்களைச் சந்தித்த டிரம்ப்பிடம், 'இந்தியா மீதான வரிகளைத் தளர்த்த பரிசீலிக்கப்படுவதாக கூறப்படுகிறதே? என்று கேள்வி எழுப்பினர். இதற்கு, 'இல்லை; இந்தியாவுடன் அமெரிக்க நட்புறவு சிறப்பாகவே உள்ளது. பல ஆண்டுகளாக இந்திய-அமெரிக்க வர்த்தகம் என்பது ஒரு சார்பாகவே (இந்தியாவுக்கு சாதகமாக) இருந்துள்ளது. இந்தியா எங்கள் மீது பல ஆண்டுகளாக மிகப்பெரிய அளவில் வரியை விதித்து வந்துள்ளது. எனவேதான், இந்தியாவுடன் அதிக வர்த்தகம் வேண்டாம் (அதிக வரி விதிப்பு) என்ற முடிவு எடுக்கப்பட்டது.