பெண்கள் சுதந்திரமாகப் பயிலவும், பணியாற்றவும் உகந்த கட்டமைப்பு

பெண்கள் சுதந்திரமாகப் பயிலவும், பணியாற்றவும் உகந்த கட்டமைப்பை தமிழக அரசு தொடர்ந்து உருவாக்கும் என்று முதல்வர் மு.க. ஸ்டாலின் உறுதி அளித்தார்.

- முதல்வர் உறுதி

சென்னை நந்தம்பாக்கம் வர்த்தக மையத்தில் உலக மகளிர் உச்சி மாநாட்டை முதல்வர் செவ்வாய்க்கிழமை தொடங்கி வைத்துப் பேசியதாவது:

இந்தியாவிலேயே பெண்கள் அதிகம் பணிக்குச் செல்லும் மாநிலம் தமிழகம். தமிழகத்தில் எந்த நிறுவனமும் புதிதாகத் தொழில் தொடங்க முன்வந்தாலும், பெண்கள் எத்தனை பேருக்கு வேலை கிடைக்கும் என்றுதான் நான் முதல் கேள்வியாக கேட்பேன்.

தற்போது தனியார் நிறுவனங்களில் பெண் தொழிலாளர்களுக்கு குறிப்பிட்ட அளவு இடங்களை ஒதுக்கத் தொடங்கிவிட்டனர். ஆனால், பெண்கள் அதிகமாக வேலைக்குச் செல்வதிலேயே நாம் திருப்தி அடைந்துவிடக் கூடாது. புதிதாக வளர்ந்துவரும் துறைகளில் பெண்கள் இடம்பெற வேண்டும். உயர் பொறுப்புகளில் ஆண்களுக்கு சரிசமமாக பெண்கள் இருக்க வேண்டும். அதற்காகத்தான், ரூ. 1,185 கோடியில் உலக வங்கி உதவியுடன், 'தமிழ்நாடு மகளிர் வேலைவாய்ப்பு மற்றும் பாதுகாப்பு' திட்டத்தைத் தொடங்கியிருக்கிறோம்.

இந்த 2 நாள் மாநாட்டில் விவாதிக்கப்படும் கருத்துகளும், அதனால் உருவாகப்போகும் ஆக்கபூர்வமான சிந்தனைகளும் இந்த இலக்கை அடைய துணை நிற்கும். பெண்கள்தான் இந்தச் சமூகத்தின் முதுகெலும்பு. மக்கள் தொகையில் சரிபாதியாக இருக்கும் பெண்கள் முன்னேறாமல், எந்த நாடும் வளர முடியாது.