எதில் போய் முடியும் இஸ்ரேல்-ஈரான் மோதல்?

ஈரான் மீது வெள்ளிக்கிழமை அதிகாலை தொடங்கியதாகக் கூறப்படும் நடவடிக்கைக்கு இஸ்ரேல் வைத்துள்ள பெயர் இது.

- 

நீண்ட நேரம் பதுங்கியிருந்து இரையைப் பிடிப்பதற்காக எழுந்து பாயும் சிங்கத்தைப் போல, ஈரானின் அணுசக்தி திட்டங்களை நிர்மூலமாக்குவதற்காக ஆண்டுக்கணக்கில் திட்டமிட்டு தற்போது முழுவீச்சில் செயல்படுத்தத் தொடங்கியுள்ளதால் இந்த நடவடிக்கைக்கு 'எழும் சிங்கம்' என்று பெயரிட்டுள்ளது இஸ்ரேல்.

உலக அரசியலிலும், சர்வதேச பங்குச் சந்தைகளிலும் அதிர்வலையை ஏற்படுத்தியிருக்கும் இந்தத் தாக்குதல், இஸ்ரேல்-ஈரான் விவகாரங்களை உன்னிப்பாக கவனித்து வருபவர்களுக்கு பெரிய அதிர்ச்சியைத் தந்திருக்காது.

இதற்கான ஆரம்பப் புள்ளியை இஸ்ரேல் பிரதமர் பெஞ்சமின் நெதன்யாகு 1990-களிலேயே வரைந்து தொடங்கிவிட்டார். ஈரானின் அணுசக்தி திட்டங்கள் அணு ஆயுதத் தயாரிப்புக்காகத்தான் என்று அடித்துக் கூறிவரும் அவர், அந்தத் திட்டங்களால் இஸ்ரேலின் இருப்புக்கே ஆபத்து என்று தொடர்ந்து எச்சரித்துவருகிறார்.

2012-ஆம் ஆண்டு ஐ.நா. சபை உரையின்போது ஈரானின் அணு குண்டை அவர் வரைபடமாகக் காட்டியது பரபரப்பாகப் பேசப்பட்டது. அணு ஆயுத எரிபொருளாகப் பயன்படுத்துவதற்கு ஏற்ற வகையில் யுரேனியத்தை ஈரான் மிகவும் அதிகமாக செறிவூட்டி வருவதாகவும் விரைவில் அந்த நாடு அணு ஆயுதத்தை அடைந்துவிடும் என்று அப்போது அவர் கடுமையாக எச்சரித்தார்.