'இண்டி' கூட்டணி வேட்பாளர் சுதர்சன் ரெட்டி

குடியரசு துணைத் தலைவர் தேர்தல்

- 

குடியரசு துணைத் தலைவர் தேர்தலில் எதிர்க்கட்சிகளின் 'இண்டி' கூட்டணியின் பொது வேட்பாளராக, தெலங்கானாவைச் சேர்ந்த உச்சநீதிமன்ற முன்னாள் நீதிபதி பி.சுதர்சன் ரெட்டி அறிவிக்கப்பட்டுள்ளார்.

தில்லியில் செவ்வாய்க்கிழமை கூட்டணிக் கட்சித் தலைவர்களுடன் செய்தியாளர்களுக்கு கூட்டாக அளித்த பேட்டியில் காங்கிரஸ் தலைவர் மல்லிகார்ஜுன கார்கே இந்த அறிவிப்பை வெளியிட்டார். எதிர்வரும் குடியரசு துணைத் தலைவர் தேர்தல் 'சித்தாந்தப் போர்' என்றும் அவர் குறிப்பிட்டார்.

நாட்டில் இரண்டாவது உயரிய அரசமைப்புப் பதவியான குடியரசு துணைத் தலைவர் பதவிக்கு நடைபெறவிருக்கும் தேர்தலில், மத்தியில் ஆளும் தேசிய ஜனநாயக கூட்டணி வேட்பாளராக மகாராஷ்டிர ஆளுநரும், தமிழகத்தைச் சேர்ந்த பாஜக மூத்த தலைவருமான சி.பி.ராதாகிருஷ்ணன் கடந்த ஞாயிற்றுக்கிழமை அறிவிக்கப்பட்டார்.

இப்போது எதிர்க்கட்சி கூட்டணியும் வேட்பாளரை அறிவித்திருப்பது, தேர்தலில் போட்டிக்கு வழிவகுத்துள்ளது. தங்களின் முடிவு தொடர்பாக, செய்தியாளர்களுக்கு எதிர்க்கட்சித் தலைவர்கள் செவ்வாய்க்கிழமை கூட்டாக பேட்டி அளித்தனர். அப்போது, கூட்டறிக்கையை வாசித்து கார்கே கூறியதாவது: எதிர்க்கட்சிகள் சார்பில் பொது வேட்பாளர் களமிறக்கப்பட வேண்டுமென்ற முடிவு ஒருமனதாக மேற்கொள்ளப்பட்டதாகும். பொது வேட்பாளர் தேர்வில், அனைத்து எதிர்க்கட்சிகளும் கருத்தொற்றுமையை வெளிப்படுத்தின. இது, ஜனநாயகத்துக்கு கிடைத்த மிகப் பெரிய வெற்றி.

ஜனநாயகமும், அரசமைப்புச் சட்டமும் தாக்குதலுக்கு இலக்காகும் போதெல்லாம், அனைத்து எதிர்க்கட்சிகளும் ஒன்றுபடுகின்றன. தற்போதைய சித்தாந்தப் போரில் (குடியரசு துணைத் தலைவர் தேர்தல்) எங்களின் பொது வேட்பாளராக பி.சுதர்சன் ரெட்டியை தேர்வு செய்துள்ளோம்.

இவர், நாட்டின் புகழ்பெற்ற முற்போக்கான நீதிபதிகளில் ஒருவர். ஆந்திர உயர்நீதிமன்றம், குவஹாட்டி உயர்நீதிமன்றம் மற்றும் உச்சநீதிமன்ற நீதிபதி என நீண்ட கால சட்ட அனுபவம் கொண்டவர். சமூக-பொருளாதார-அரசியல் நீதியின் நிலையான மற்றும் துணிச்சல்மிக்க பாதுகாவலனாக செயல்படுபவர். ஏழைகளின் ஆதரவாளர். தனது பல்வேறு தீர்ப்புகளின் வாயிலாக ஏழைகள் மற்றும் அவர்களின் அடிப்படை உரிமைகளின் பாதுகாப்பை உறுதி செய்துள்ளார்.