பாஜகவின் ஜாதி வாக்குவங்கிக் கணக்கு!

தவறான அரசியல் வியூகத்தால் மக்களவைத் தேர்தலில் அடைந்த பின்னடைவின் தாக்கத்திலிருந்து மீண்டெழும் முயற்சியில் பாஜக இறங்கியிருக்கிறது.

- அஜாதசத்ரு

தமிழகம், புதுச்சேரி உள்ளிட்ட 40 மக்களவைத் தொகுதிகளிலும் திமுக கூட்டணி வெற்றி பெற்றதற்கு பாஜகவின் அதிமுக புறக்கணிப்புதான் காரணம் என்பதை இப்போது அந்தக் கட்சியின் தலைமை உணர்ந்திருப்பதாகத் தெரிகிறது.

மத்திய உள்துறை அமைச்சர் அமித் ஷாவின் அழைப்பின்பேரில் அதிமுக பொதுச்செயலாளரும், முன்னாள் முதல்வருமான எடப்பாடி கே.பழனிசாமி அவரை தில்லியில் சென்று சந்தித்ததன் தொடர்ச்சியாக இப்போது தமிழக பாஜக தலைமையில் மாற்றம் ஏற்பட்டிருக்கிறது.

தமிழகத்தைப் பொருத்தவரை அது திமுகவானாலும், அதிமுகவானாலும் தனித்துக் களம் கண்டு ஆட்சியைக் கைப்பற்ற முடியாது என்பது அந்தக் கட்சிகள் உள்ளிட்ட அனைவருக்கும் தெரியும். அதே நேரத்தில், திமுக அல்லது அதிமுக தலைமையில் கூட்டணி அமையாமல் ஆட்சியைக் கைப்பற்றுவது என்பது சாத்தியமில்லை என்பதுதான் எதார்த்த நிலைமை. பூத் அளவிலான அடிப்படை கட்டமைப்புள்ள கட்சிகள் அவை இரண்டு மட்டுமே என்பதுதான் அதற்குக் காரணம். 2026 சட்டப்பேரவைத் தேர்தலை வலுவான கூட்டணி இல்லாமல் எதிர்கொண்டு ஆட்சியைக் கைப்பற்றுவது சாத்தியமில்லை என்பதை அதிமுக, குறிப்பாக அதன் பொதுச் செயலாளர் எடப்பாடி கே.பழனிசாமி உணர்ந்திருப்பதாகத் தெரிகிறது.

அதேபோல, எடப்பாடி கே.பழனிசாமி தலைமையிலான அதிமுகவை அகற்றி நிறுத்திவிட்டு மூன்றாவது அணி அமைப்பதோ, தேர்தலில் வெற்றிபெற நினைப்பதோ தோல்வியில் தான் முடியும் என்பதை பாஜகவுக்கு 2024 மக்களவைத் தேர்தல் உணர்த்திவிட்டது.

இந்தப் பின்னணியில்தான் உள்துறை அமைச்சர் அமித் ஷாவின் சென்னை விஜயமும், பாஜகவின் மாநிலத் தலைமை மாற்றமும் பார்க்கப்பட வேண்டும். பாஜகவின் முக்கியஸ்தர்கள் பலரும் அதிமுகவில் பிளவை ஏற்படுத்தவும், தலைமையில் மாற்றம் ஏற்படுத்தவும் எடுத்த முயற்சிகள் தோல்வி அடைந்திருக்கின்றன என்று தெரிகிறது.