தமிழக ஆளுநரின் செயல் சட்டத்துக்கு எதிரானது

தமிழக சட்டப்பேரவையில் நிறைவேற்றி ஒப்புதலுக்காக அனுப்பி வைத்த 10 மசோதாக்களை நிறுத்திவைத்த மாநில ஆளுநரின் செயல்பாடு சட்டத்துக்கு எதிரானது என்று உச்சநீதிமன்றம் செவ்வாய்க்கிழமை தீர்ப்பளித்தது.

- 

புது தில்லி, ஏப். 8:

மாநில சட்டப்பேரவை அனுப்பும் மசோதாக்களை நிறைவேற்றாமல் தாமதப்படுத்த ஆளுநருக்கு வீட்டோ (தனி) அதிகாரம் என ஏதுமில்லை என்றும் உச்சநீதிமன்றம் தெரிவித்தது.

அசாதாரணமானதாகக் கருதப்படும் இந்தத் தீர்ப்பு மூலம், இனி பேரவை அனுப்பும் மசோதாக்கள் மீது ஆளுநர்கள் எவ்வாறு செயல்பட வேண்டும்? அவர்கள் எத்தனை நாள்களுக்குள் மசோதா மீது முடிவெடுக்க வேண்டும்? என காலவரம்பு நிர்ணயிக்கப்பட்டுள்ளது.

தமிழக சட்டப்பேரவையில் நிறைவேற்றப்பட்ட பல்கலைக்கழகத் துணைவேந்தர்கள் நியமன அதிகாரம், பல்கலைக்கழக வேந்தர் பதவியில் இருந்து ஆளுநரை நீக்க வகை செய்யும் மசோதா உள்பட 10 மசோதாக்களுக்கு ஆளுநர் ஆர்.என். ரவி ஒப்புதல் வழங்காமல் தாமதப்படுத்தி அவற்றை குடியரசுத் தலைவருக்கு அனுப்பி வைத்ததாக சர்ச்சை எழுந்தது.

இந்த விவகாரம் தொடர்பாக உச்சநீதிமன்றத்தில் தமிழக அரசு சார்பில் 2023, நவம்பரில் ரிட் மனு தாக்கல் செய்யப்பட்டது. அதை நீதிபதிகள் ஜே.பி. பார்திவாலா, ஆர். மகாதேவன் ஆகியோர் அடங்கிய அமர்வு கடந்த சில மாதங்களாக விரிவாக விசாரித்தது. தமிழக அரசு சார்பில் மூத்த வழக்குரைஞர்கள் அபிஷேக் மனு சிங்வி, முகுல் ரோத்தகி, பி. வில்சன் ஆகியோரும், ஆளுநர் மற்றும் மத்திய அரசின் சார்பில் தலைமை சட்ட ஆலோசகர் (அட்டர்னி ஜெனரல்) ஆர். வெங்கடரமணியும் ஆஜராகினர்.

கடைசியாக கடந்த பிப். 11-ஆம் தேதி இந்த வழக்கை உச்சநீதிமன்றம் விசாரித்தபோது, தமிழக அரசுக்கும் ஆளுநர் தரப்புக்கும் பல்வேறு கேள்விகளை எழுப்பி அவற்றுக்கான பதிலை எழுத்துப்பூர்வமாக தாக்கல் செய்ய உத்தரவிட்டு தீர்ப்பை ஒத்திவைத்தது.

மூன்று வாய்ப்புகள்: இந்நிலையில், மூத்த நீதிபதி ஜே.பி. பார்திவாலா எழுதியுள்ள இந்த வழக்கின் தீர்ப்பு செவ்வாய்க்கிழமை அளிக்கப்பட்டது. அதன் முக்கிய அம்சங்கள் வருமாறு: