சாதனைத் தலைமுறையின் வருகை

மலேசிய தலைநகர் கோலாலம்பூரில் கடந்த ஞாயிற்றுக்கிழமை (பிப். 2) நிறைவடைந்த 19 வயதுக்கு உட்பட்டோருக்கான டி20 உலகக் கோப்பை மகளிர் கிரிக்கெட் போட்டியில் சாம்பியன் பட்டத்தை இந்திய அணி தக்கவைத்து சாதனை படைத்துள்ளது.

- 

2023-ஆம் ஆண்டு அறிமுகப்படுத்தப்பட்டு தென்னாப்பிரிக்காவில் நடைபெற்றபோது இறுதி ஆட்டத்தில் இங்கிலாந்தை வீழ்த்தி இந்திய அணி முதல் கோப்பையை வென்றது. இப்போது இறுதி ஆட்டத்தில் தென்னாப்பிரிக்காவை வீழ்த்தி இரண்டாவது முறையும் கோப்பையைக் கைப்பற்றியிருக்கிறது.

இந்த இரண்டு உலகக் கோப்பை போட்டிகளிலுமே 16 அணிகள் பங்கேற்றன. 2025 போட்டியில் தாங்கள் விளையாடிய 7 ஆட்டங்களிலுமே வென்ற இந்திய அணி, 2023-ஆம் ஆண்டு போட்டியில் 7 ஆட்டங்களில் 6-இல் வெற்றி பெற்றது. இந்திய அணியின் வெற்றியில் அனைவரின் பங்களிப்பு இருந்தது என்றாலும் ஆல்ரவுண்டர் கொங்கடி திரிஷா, விக்கெட் கீப்பர் - பேட்டர் கமலினி, பௌலர்கள் ஆயுஷி சுக்லா, வைஷ்ணவி சர்மா, பருனிகா சிசோடியா ஆகியோரின் பங்களிப்பு குறிப்பிடத்தக்கது.

போட்டியிலேயே அதிகபட்சமாக வைஷ்ணவி சர்மா 17 விக்கெட்டுகள் சாய்க்க, ஆயுஷி சுக்லா (14 விக்கெட்டுகள்), பருனிகா சிசோடியா (10) ஆகியோர் வெற்றிகளுக்கு உறுதுணையாக இருந்தனர். தெலங்கானாவைச் சேர்ந்த கொங்கடி திரிஷா, ஸ்காட்லாந்துக்கு எதிரான ஆட்டத்தில் ஆட்டமிழக்காமல் 110 ரன்கள் விளாசியதன் மூலம் டி20 உலகக் கோப்பை போட்டிகளில் சதம் அடித்த ஒரே வீராங்கனை என்ற சிறப்பைப் பெற்றார்.