விவேகானந்தரும் சென்னை ராமகிருஷ்ண மடமும்!

சென்னை வந்த சுவாமி விவேகானந்தரிடம் சென்னையில் ஒரு ராமகிருஷ்ண மடம் வேண்டும் என சென்னை மக்கள் கோரிக்கை வைத்தார்கள்.

- திருப்பூர் கிருஷ்ணன்

அவர்களின் உள்ளார்ந்த அக்கறையை உணர்ந்த சுவாமிகள் அந்தக் கோரிக்கையை உடனே ஏற்றார். விவேகானந்தர் பணித்தபடி, பரமஹம்சரின் நேரடி சீடரும் சசி மகராஜ் என அழைக்கப்படுபவருமான சுவாமி ராமகிருஷ்ணானந்தர் 1897-இல் சென்னை ராமகிருஷ்ண மடத்தை நிறுவினார். தலைமை மடமான பேலூர் மடத்தின் கீழ் தென்னிந்தியாவில் அமைந்துள்ள முதல் கிளை மடம் இது.

சென்னை மடம் முதலில், தற்போது விவேகானந்தர் இல்லம் என அழைக்கப்படும் ஐஸ் ஹவுஸில் இருந்தது. பின்னர் மயிலாப்பூரில் அதற்கு கட்டடம் அமைந்தது.

அந்த ராமகிருஷ்ண மடத்தின் அருகிலேயே பரமஹம்சருக்கு ஒரு புதிய பிரபஞ்சக் கோயில் 2000-ஆம் ஆண்டில் நிறுவப்பட்டது.

மடத்தில் நாள்தோறும் மாலை ஆறரை மணிக்கு பகவான் ஸ்ரீ ராமகிருஷ்ண பரமஹம்சருக்கு ஆரத்தி நிகழ்த்தப்படுகிறது. துறவியர் மனமொன்றி நிகழ்த்தும் ஆரத்தியில் கலந்துகொள்வது அன்பர்களுக்கு கிட்டும் பெரிய பேறு.

புண்ணிய தினங்களில் பல்வேறு கொண்டாட்டங்கள் ஸ்ரீ மடத்தில் நடைபெறுகின்றன. ராம நவமி, கிருஷ்ண ஜெயந்தி, பரமஹம்சர் ஜெயந்தி, விவேகானந்தர் ஜெயந்தி, சாரதா தேவி ஜெயந்தி, புத்த பூர்ணிமா, நவராத்திரி போன்ற புனித தினங்களில் மடமே விழாக்கோலம் பூணுகிறது.

பஜனைகள், கச்சேரிகள், கலை நிகழ்ச்சிகள், சொற்பொழிவுகள் என மடம் களை கட்டுகிறது.

'விவேகானந்த இலக்கியத்தைப் படித்து என் தேசபக்தி ஆயிரம் மடங்காயிற்று' என மகாத்மா காந்தி குறிப்பிட்டுள்ளார். 'ஆளுமை வளர்ச்சியில் விவேகானந்த இலக்கியத்தைவிட, வேறொன்றை என்னால் உயர்ந்ததாகக் கூறமுடியாது' என்று நேதாஜி கூறியுள்ளார்.

ராமகிருஷ்ண மடம் செய்துவரும் ஆன்மிக இலக்கியப் பணி, மடம் செய்துவரும் தொண்டுகளில் மிக உயர்ந்ததும் ஒப்பிட முடியாததும் ஆகும்.

1908-இல் ராமகிருஷ்ணானந்தர் தொடங்கியது இந்தப் பதிப்பியக்கம். ராமகிருஷ்ணர், சாரதா தேவி, விவேகானந்தர் சிந்தனைகளைப் பரப்புவதே இந்தப் பதிப்பியக்கத்தின் நோக்கம்.