வாய்ப்புகள் வெற்றிகளாகட்டும்!

வாய்ப்புகள் எப்பொழுதாவது ஒரு முறைதான் நம் வாசல் கதவைத் தட்டும். அதை நல்வாய்ப்பாக மாற்றிக் கொள்வது நம் கையில்தான் இருக்கிறது.

- 

இவ்வாய்ப்புகள் நமக்கு நண்பர்கள், உறவினர்கள், புதிய சந்திப்புகள் போன்றவற்றின் மூலம் அமையலாம்.

நாம் ஒவ்வொருவரும் வாழ்க்கையில் ஒவ்வொரு நாளும் ஓரளவாவது அடுத்த மேல்நிலைக்குச் செல்ல விரும்புகிறோம். வாய்ப்பு உள்ளவர்களுக்கு இது எளிதில் சாத்தியமாகிறது. ஆனால் வாய்ப்புகள் எல்லாருக்கும் எப்போதும் எளிதில் கிடைப்பதில்லை. எனவே மிகவும் அரிதாகக் கிடைக்கும் வாய்ப்புகளை நாம் நல்ல முறையில் பயன்படுத்திக் கொள்ள முனைவது நல்லது. நாம் ஏழையாகப் பிறப்பது நமது தவறு அல்ல. ஆனால் ஏழையாகவே இறப்பது நமது சோம்பேறித்தனத்தின் வெளிப்பாடே ஆகும்.

படித்த மாணவர்கள் இடையே தற்போது வேலையின்மை பரவலாக இருப்பதைப் பார்க்க முடிகிறது. அதற்குக் காரணம் சந்தையில் வேலைக்கான வாய்ப்பு இல்லை என்பது இல்லை. பணியைத் தருவோர் எதிர்பார்க்கும் போதுமான அளவு திறமை வேலை தேடுவோரிடம் இல்லை என்பதே உண்மை.

நமது செயல்பாடுகளில் பணம், நேரம், உடல் சக்தி இவை மூன்றையும் நாம் பயன்படுத்தி வளர்கிறோம். வாழ்கிறோம். நமது வாழ்க்கைப் பகுதியை மழலைப் பருவம், வாலிபப் பருவம், முதுமைப் பருவம் என மூன்று பிரிவுகளாகப் பிரிக்கலாம். இதில் மழலையாக இருக்கும்போது நேரம் மட்டுமே அதிகமாக நம்மிடம் இருக்கும்.

வாலிபப் பருவத்தில்தான் பணம், உடலில் சக்தி, நேரம் ஆகியவை அதிகமாக இருக்கும். இந்தப் பருவத்தில் வரும் வாய்ப்புகளைத் தவறவிடாமல் பார்த்துக் கொள்வது நல்லது. முதுமையில் பணமும், நேரமும் இருக்கலாம். ஆனால் முதுமைக்கே உரிய இயலாமை உடலில் வந்துவிடும். அதனால் வாய்ப்புகள் வராது. வந்தாலும் பயனில்லை.