அசுர வேகத்தில் பாயும் புதுவகை ஏவுகணை மூலம் தாக்குதல் அமெரிக்கா, பிரிட்டனுக்கு புதின் எச்சரிக்கை

மாஸ்கோ, நவ. 22: தங்கள் ஆயுதங்கள் மூலம் ரஷியாவுக்குள் தாக்குதல் நடத்த அனுமதிக்கும் அமெரிக்க, பிரிட்டன் ராணுவ நிலைகளில், புதிதாக உருவாக்கப்பட்டுள்ள அதிவேக ஏவுகணை மூலம் தாக்குதல் நடத்தப்படும் என்று ரஷிய அதிபர் விளாதிமீர் புதின் எச்சரிக்கை விடுத்துள்ளார்.

- 

உக்ரைனில் கண்டம் விட்டு கண்டம் பாயும் (ஐசிபிஎம்) ஏவுகணையை ரஷியா புதன்கிழமை நள்ளிரவு வீசியதாக அந்த நாடு குற்றஞ்சாட்டிய நிலையில், அது புதிதாக உருவாக்கப்பட்டுள்ள, ஒலியைப்போல் 10 மடங்கு வேகத்தில் பாயக்கூடிய 'ஒரேஷ்னிக்' என்ற ஏவுகணை என்பதை புதின் தெளிவுபடுத்தியுள்ளார்.

இது குறித்து நாட்டு மக்களுக்கு ஆற்றிய உரையில் அவர் கூறியதாவது: உக்ரைனில் நடைபெற்று வரும் போர் மேற்கத்திய நாடுகளால் தூண்டப்பட்டது. தற்போது தாங்கள் தயாரித்த நீண்ட தொலைவு ஏவுகணைகள் மூலம் ரஷியா மீது தாக்குதல் நடத்த உக்ரைனுக்கு அவை அனுமதி வழங்கியுள்ளன. அத்தகைய ஏவுகணைகளைத் தயாரித்த நாடுகளின் நேரடி பங்களிப்பில்லாமல் அவற்றை ரஷியா மீது வீச முடியாது என்பது அனைவருக்கும் நன்றாகவே தெரியும்.

இந்தச் சூழலில், கடந்த செவ்வாய்க்கிழமை (நவ. 19) அமெரிக்காவின் அட்டாக்கம்ஸ் ஏவுகணைகள் ரஷியா மீது வீசப்பட்டன. தொடர்ந்து வியாழக்கிழமை (நவ.21) பிரிட்டனில் தயாரிக்கப்பட்ட ஸ்டார்ம் ஷேடோ, அமெரிக்காவில் தயாரிக்கப்பட்ட ஹிம்ராஸ் ஏவுகணைகளைக் கொண்டு ரஷியா மீது தாக்குதல் நடத்தப்பட்டது.

இந்த நிகழ்வுகளுக்குப் பிறகு, வெறும் பிராந்திய சண்டையாக இருந்த உக்ரைன் போர், உலகளாவிய போராக உருவெடுத்துள்ளது.

இதில் அட்டாக்கம்ஸ் ஏவுகணைகள் இடைமறித்து அழிக்கப்பட்டதால் எந்த பெரிய பாதிப்பும் இல்லை. ஆனால், கூர்ஸ்க் பிராந்தியத்திலுள்ள ராணுவ கட்டளையகத்தைக் குறிவைத்து வீசப்பட்ட ஸ்டார்ம் ஷேடோ ஏவுகணையால் உயிரிழப்புகள் ஏற்பட்டன. இருந்தாலும், அந்த கட்டளையகத்தின் அதிகாரிகள், வீரர்களுக்கு எந்தப் பாதிப்பும் ஏற்படவில்லை. அது, கூர்ஸ்க் பிராந்தியத்துக்குள் ஊடுருவியுள்ள உக்ரைன் படையினரை விரட்டியடிப்பதற்கான பணியை தங்குதடையின்றி தொடர்ந்து மேற்கொள்ளும்.

மேற்கத்திய ஏவுகணைகளை ரஷியா மீது வீசுவதால் உக்ரைன் போரின் போக்கை மாற்றிவிட முடியாது. ரஷிய ராணுவம் தொடர்ந்து முன்னேறிக் கொண்டுதான் இருக்கிறது. எங்களது இந்த சிறப்பு ராணுவ நடவடிக்கைகளின் இலக்குகளை அடைந்தே தீருவோம்.