மணிப்பூர் பாஜக அரசுக்கு ஆதரவு வாபஸ்

கூட்டணிக் கட்சி திடீர் முடிவு மேலும் 4 எம்எல்ஏ-க்களின் வீடுகளுக்கு தீவைப்பு

- 

இம்பால், நவ. 17: மணிப்பூரில் வன்முறைக்கு தீர்வுகாண தவறிவிட்டதாகக் குற்றஞ்சாட்டி, மாநில பாஜக அரசுக்கு அளித்து வந்த ஆதரவை கூட்டணிக் கட்சியான தேசிய மக்கள் கட்சி (என்பிபி) ஞாயிற்றுக்கிழமை திரும்பப் பெற்றது.

மணிப்பூரில் தீவிரவாதிகளால் 6 பேர் கடத்திக் கொல்லப்பட்ட சம்பவத்தைக் கண்டித்து, கடந்த சனிக்கிழமை போராட்டங்கள் வெடித்தன. மணிப்பூர் அமைச்சர்கள் மற்றும் எம்எல்ஏக்களின் வீடுகள் தாக்குதலுக்கு இலக்கானதால் பதற்றம் நிலவுகிறது. இந்தச் சூழலில், மேகாலய முதல்வர் கான்ராட் சங்மா தலைமையிலான தேசிய மக்கள் கட்சி, மணிப்பூர் அரசுக்கு அளித்து வந்த ஆதரவை திரும்பப் பெற்றுள்ளது.

60 இடங்களைக் கொண்ட மணிப்பூர் சட்டப்பேரவையில் தேசிய மக்கள் கட்சிக்கு 7 எம்எல்ஏக்கள் உள்ளனர். ஆளும் பாஜக 32 எம்எல்ஏக்களுடன் தனிப்பெரும்பான்மை பலத்துடன் உள்ளது. நாகா மக்கள் முன்னணி (5), ஐக்கிய ஜனதா தளம் (6) கட்சிகளின் ஆதரவும் பாஜகவுக்கு இருப்பதால் ஆட்சிக்குப் பாதிப்பில்லை. எதிர்க்கட்சியான காங்கிரஸுக்கு 5 எம்எல்ஏக்களும், 3 சுயேச்சை எம்எல்ஏக்களும் உள்ளனர்.

ஆதரவு வாபஸ் ஏன்? மணிப்பூர் பாஜக அரசுக்கான ஆதரவை திரும்பப் பெற்றது குறித்து பாஜக தேசியத் தலைவர் ஜெ.பி.நட்டாவுக்கு தேசிய மக்கள் கட்சி கடிதம் அனுப்பியுள்ளது.