தென் மாவட்டங்களில் கனமழை எச்சரிக்கை

தென் மாவட்டங்களில் ஓரிரு இடங்களில் சனிக்கிழமை (மே 18) முதல் மே 21-ஆம் தேதி வரை மிக கனமழை பெய்ய வாய்ப்புள்ளதால், ‘ஆரஞ்ச்’ எச்சரிக்கை விடப்பட்டுள்ளதாக சென்னை வானிலை ஆய்வு மையம் தெரிவித்துள்ளது.

- 

 

இது குறித்து வெள்ளிக்கிழமை வெளியிடப்பட்ட செய்தி: தென் தமிழக கடலோரப் பகுதிகளின் மேல் வளிமண்டல கீழடுக்கு சுழற்சி நிலவுகிறது. இதனால் தமிழகத்தில் பல மாவட்டங்களில் மிதமான மழை பெய்தது.

இதன்படி, வெள்ளிக்கிழமை காலை வரை பதிவான மழை அளவு (மில்லி மீட்டரில்): மைலாடி (கன்னியாகுமரி) - 70, திருச்செந்தூா் (தூத்துக்குடி), வால்பாறை (கோவை), நன்னிலம் (திருவாரூா்) - தலா 60, கடலூா் , கொட்டாரம் (கன்னியாகுமரி) - தலா 50. மேலும் தமிழகத்தில் பல்வேறு இடங்களில் மிதமான மழை பெய்தது.

மிக கனமழை எச்சரிக்கை: இதைத் தொடா்ந்து, தமிழகத்தில் அநேக இடங்களிலும், புதுச்சேரி மற்றும் காரைக்கால் பகுதிகளிலும் சனிக்கிழமை (மே 18) முதல் மே 21-ஆம் தேதி வரை இடி, மின்னல் மற்றும் பலத்த காற்றுடன் பரவாலக மழை பெய்யும். டெல்டா உள்ளிட்ட சில மாவட்டங்களில் கன மழை பெய்ய வாய்ப்புள்ளது.

மேலும், மே 18-ஆம் தேதி திண்டுக்கல், தேனி, தென்காசி மாவட்டங்களில் ஓரிரு இடங்களிலும், மே 19-இல் திண்டுக்கல், தேனி, தென்காசி, திருநெல்வேலி, கன்னியாகுமரி ஆகிய மாவட்டங்களில் ஓரிரு இடங்களிலும் மிக கன மழை பெய்ய வாய்ப்புள்ளது.