HAAR PASSIE KOM UIT SEER

WANNEER Rachel Jaars (61) van Ravensmead deur die gange van die Tygerberg Hospitaal stap, dra sy meer as net haar vrywilligerskaartjie - sy dra die hoop van iemand wat al self in die dal van doodskaduwee geloop het.

- KHIRSTEN BOOYS

As 'n palliative care worker help sy families om voor te berei vir die onvermydelike wanneer dokters alles in hulle vermoë gedoen het en daar niks meer is wat die mediese wetenskap kan bied nie.

"Dit is my passie," sê sy met 'n sagtheid in haar stem wat uit jare van pyn en genesing gebore is.

"Ek doen dit vrywillig omdat ek weet hoe dit voel om daar te wees."

Sy vertel haar reis tot hierdie roeping het begin met 'n hart-verskeurende verlies. "Toe my suster aan borskanker gesterf het, het die kanker so vinnig versprei en haar hele liggaam aangetas. Net haar brein was normaal," onthou Rachel.

"Ek was by haar en dit was nie vir my maklik nie, maar agterna kon sy tot rus kom en saggies sterf."

Hierdie ervaring het haar voorberei vir veral dit wat sy nie geweet het kom nie. Op die ouderdom van 23 is borskanker by haar gediagnoseer.

"Ek het gehuil, ek was in 'n toestand en het gevra: 'Hoekom ek?' Maar die Here was so kragtig," vertel sy.