આ તો હાથ ધોઈ નાખવાની ગંદી રમત છે...

કોલકાતાની એક મહિલા ડૉક્ટરના કમોત પર ગંદું રાજકારણ રમાઈ રહ્યું છે. રેપ ઍન્ડ મર્ડર કેસમાં કડક સજાની જોગવાઈ ધરાવતો કાનૂન અસ્તિત્વમાં હોવા છતાં બંગાળનાં મુખ્ય મંત્રી મમતા બેનરજીએ પોતાની ફરજ ચાતરી જવાના દેખીતા ઈરાદે નવો કાયદો લાવવાની ચાલ ખેલી છે.

- હીરેન મહેતા

જે થયું અને એ પછી પોતાની સરકારે જે ઠાગાઠેયા કર્યા એની જવાબદારીમાંથી હાથ ખંખેરી નાખવા પશ્ચિમ બંગાળનાં મુખ્ય મંત્રી મમતા બેનરજીએ બળાત્કાર માટે અપરાધીને મોતની સજા ફરમાવતો ખરડો વિધાનસભામાં પસાર કરાવ્યો છે.

કોલકાતાની સરકારી હૉસ્પિટલ અને મેડિકલ કૉલેજ સાથે સંકળાયેલી મહિલા તબીબ પર બળાત્કાર કર્યા બાદ એની હત્યા થઈ, એના કલાકો પછી એ મહિલાના પરિવારજનોને ઘટના વિશે અંધારામાં રાખવામાં આવ્યા હોવા છતાં એ માટે જેની નૈતિક જવાબદારી હતી એ મેડિકલ કૉલેજના પ્રિન્સિપાલને મમતા સરકારે થાબડભાણાં કરતી હોય એમ વધુ મોટી હૉસ્પિટલમાં એમની બદલી કરી. એ પછી નિર્લજ્જતાની હદનું ઔર એક પગથિયું નીચે ઊતરતાં હોય એમ મમતાએ પક્ષનાં મહિલા સાંસદો સાથે કોલકાતાની સડક પર આવી પેલી મહિલા તબીબ માટે ન્યાયની માગણી કરી. બંગાળનાં મુખ્ય મંત્રી અને ગૃહપ્રધાન તરીકે એ કામ ખરેખર તો મમતાનું પોતાનું હતું!

મહિનો થવા આવ્યો હોવા છતાં બંગાળના કેટલાક તબીબોએ એમનું આંદોલન ચાલુ રાખ્યું છે.

હજી આ મામલો ઠંડો પડતો નથી અને બંગાળના તબીબોએ એમનું આંદોલન ચાલુ રાખ્યું છે એટલે મમતાએ નવું ગતકડું કર્યું: બળાત્કારનો ગુનો સાબિત થાય એને સજા-એ-મોત આપતો ખરડો એમણે વિધાનસભામાં મૂક્યો, જેથી હવે પછી કેસમાં કંઈ પણ વિલંબ થાય તો પોતે સિફતથી કેન્દ્ર સરકારને ખો આપી શકે. સર્વોચ્ચ અદાલતે આ કેસની તપાસ કેન્દ્રીય એજન્સી સીબીઆઈને સોંપી દીધી છે એટલે બંગાળ સરકારનો ઘોડો આમ પણ છુટ્ટો જ છે.

બળાત્કાર અને હત્યાના અતિ અસામાન્ય કહી શકાય એવા કિસ્સા (ફૅરેસ્ટ ઑફ રૅર કેસ)માં અત્યારે પણ આપણે ત્યાં ફાંસી એટલે કે મોતની સજા આપવાની જોગવાઈ છે. ૨૦૧૦ના દાયકામાં પહેલાં કોલકાતા ને ત્યાર બાદ દિલ્હીના નિર્ભયા કેસમાં ગુનેગારોને ફાંસી આપવામાં પણ આવી હતી એટલે આમ જોઈએ તો બંગાળ સરકારે પસાર કરાવેલા ખરડાનો અર્થ નથી. બંગાળના રાજ્યપાલ એને મંજૂરી આપશે તો પણ આ ખરડો રાષ્ટ્રપતિ સમક્ષ જશે. સવાલ એ છે કે કેન્દ્રીય સ્તરે એક કાયદો અસ્તિત્વમાં હોય તો રાજ્ય સરકારે અલગથી એ જ પ્રકારનો કાયદો બનાવવાની જરૂર છે ખરી?