બજેટ ૨૦૨૪-૨૫: બધા માટે થોડું થોડું...

આડેધડ લહાણી નહીં, પણ પગારદાર-મધ્યમ વર્ગ, મહિલાઓ, યુવાનો તથા ખેડૂતોનું દિલ જીતવાનો પ્રયાસ.

- જયેશ ચિતલિયા

મોદી સરકારના નવી ટર્મના પ્રથમ બજેટે શૅરબજારને પ્રથમદર્શી રીતે નિરાશ કરીને પગારદાર, મધ્યમ વર્ગ અને લઘુ-મધ્યમ ઔદ્યોગિક એકમોને રાહત તેમ જ પ્રોત્સાહન આપવાનો પ્રયાસ કર્યો છે. આ ઉપરાંત, સૌથી વધુ ધ્યાન જેના પર આપવામાં આવ્યું છે એમાં રોજગાર સર્જન અને કૃષિ વિકાસ પર તેમ જ ખેડૂતોને રાહત અને યુવા તેમ જ મહિલા વર્ગનો સમાવેશ થાય છે. સતત સાતમી વાર બજેટ રજૂ કરનારાં નાણાપ્રધાન નિર્મલા સીતારમણે આર્થિક-રાજકીય બન્ને મોરચે કુનેહપૂર્વક કામ પાર પાડ્યું હોવાનું કહી શકાય. સારી વાત એ ગણાય કે બજેટે આડેધડ લહાણી ન કરી. આપણે આ બજેટની કેટલીક મહત્ત્વની જાહેરાત તેમ જ એની સંભવિત અસરોની ઝલક જોઈએ.

પગારદાર વર્ગ–મધ્યમ વર્ગ

પગારદાર અને મધ્યમ વર્ગને ધ્યાનમાં રાખીને વાત કરીએ તો સરકાર હાલનાં બે જુદાં જુદાં કરમાળખાંને સ્થાને નવા માળખા (ન્યુ ટૅક્સ રિજીમ)ને પ્રોત્સાહન આપવાનો ઈરાદો રાખતી હોવાનું કહી શકાય. કરદાતાઓ નવા રિજીમને પસંદ કરે એ માટે નાણાપ્રધાને નોંધપાત્ર રાહત આપી દઈને પરોક્ષ રીતે લોકોને નવા કરમાળખા તરફ વાળવાનો ઉદ્દેશ રાખ્યો છે અર્થાત્ સરકાર વિવિધ કરરાહતો અને કરમુક્તિમાંથી કરદાતાઓને બહાર કાઢવા માગે છે, જે લાંબે ગાળે ફરજિયાત કર બચાવવાના ઈરાદાથી ચોક્કસ બચત યોજનાઓ તરફ વળતા વર્ગને નિરુત્સાહ કરશે.

નિર્મલા સીતારમણનું અંદાજપત્ર આવ્યું... કોના માટે શું શું લાવ્યું?

આનો બીજો અર્થ એ થાય કે લોકો કર બચાવવાની યોજનાઓને બદલે સીધા યા મ્યુચ્યુઅલ ફંડ મારફત ઈક્વિટી માર્કેટ તરફ વધુ વળશે એમ કહી શકાય. નવું કરમાળખું આનો સ્પષ્ટ સંકેત આપે છે.