આજની ઘડી તે રળિયામણી...

દિલાસો ખોટો આપ ના જનમ-જનમની વાતનો ગુજારવો છે બસ અહીં, આ એક ભવની વાત કર. શાંતિલાલ કાશિયાણી

- હિતેન આનંદપરા

હિંદુ માન્યતા પ્રમાણે જીવ ચોર્યાસી લાખ જન્મના ચક્રમાંથી પસાર થાય છે. લગ્નવિધિમાં સાત જન્મ સાથે રહેવા માટે સપ્તપદીમાં વિધાન કરાયું છે.

પૂર્વજન્મ યાદ હોય એવા અનેક કિસ્સા અવારનવાર આપણી સામે આવતા રહે છે. પાંચ-સાત વર્ષના બાળકને જાણે કોઈ વિશારદ હોય એમ સુરીલું ગાતાં સાંભળીએ ત્યારે આશ્ચર્ય થાય. જે સંગીતવિદ્યાનું જ્ઞાન મેળવવા વર્ષોની સાધના અને આરાધના જોઈએ એ માસૂમ બાળકને એમનેમ તો ન જ આવડી જાય. ગયા જન્મના સંસ્કાર જરૂર એનામાં હશે.

આ બધી બાબતો અંગે વૈજ્ઞાનિક પ્રમાણ ન મળે તો તાર્કિક વિચારો તરફ વળવું પડે. ધારો કે પૂર્વજન્મ અને પુનર્જન્મ અંગેનાં પ્રમાણ મળે તો પણ વિચાર આ જન્મની યથાર્થતાનો છે. એમાં કલ્પના કે અનુમાન નથી, પણ વાસ્તવિકતા છે એટલે આપણે આ વાસ્તવિકતામાં જ દાર્શનિકતા શોધવાની હોય.