બાળકોને શક્તિ-સ્ફૂર્તિ બક્ષવાના આ છે વિકલ્પ...

ઊછળવા-કૂદવા-રમવાની ઉંમરે જરૂર આપો પ્રોટીનસભર ખોરાક.

- હિરવા ભોજાણી

આહાર-વિહારની કૉલમમાં આ વખતે પ્રસ્તુત છે અમુક વાચકમિત્રો પાસેથી મળેલા પ્રશ્નોના ઉત્તર...

પ્રશ્નઃ મારા પૌત્રની ઉંમર ૧૧ વર્ષ છે. એ ક્રિકેટ રમવા સ્પોર્ટ્સ એકેડેમીમાં જાય છે. જો કે રમતી વખતે એ ઝડપથી થાકી જાય છે તો એને પૂરતું પોષણ મળી રહે એવો આહાર સૂચવવા વિનંતી.

મુકુંદકારિયા(અમદાવાદ)

ઉત્તરઃ ક્રિકેટ અથવા કોઈ પણ આઉટડોર રમત રમવી એ ખૂબ સારી વાત છે, એનાથી શારીરિક વિકાસ સારો થાય છે અને શરીર સ્ફૂર્તિવાન બને છે. જો કે એની સાથે અપૂરતો આહાર લેવાય તો નબળાઈ અને થાક પણ જલદી લાગે છે.

શરીરને શક્તિ મેળવવા માટે પૂરતી કૅલરી તેમ જ પ્રોટીનની જરૂરત રહે છે. એ માટે તમારો પૌત્ર નિયમિત રીતે પોષક આહાર લે એ જરૂરી છે.

આ આહારમાં પ્રોટીન પૂરતા પ્રમાણમાં લેવાય એ જોવું. સવારે નાસ્તામાં એને ફણગાવેલા કઠોળમાં ચાટ મસાલો નાખીને આપી શકાય. પનીરની વાનગીઓ સામાન્ય રીતે બાળકોને પસંદ હોય છે તો એનો ઉપયોગ પણ પરલો ટમેટાં તેમ અઠવાડિયામાં બે-ત્રણ વખત કરી શકાય. બેસન અથવા મૂંગ ચિલ્લામાં બારીક સમારેલાં ટમેટાં તેમ જ કૅપ્સિકમ અને ડુંગળી (કાંદા) નાખીને આપવાથી બાળકોને એ ખાવાનું ભાવશે. અત્યારે માર્કેટમાં પ્રોટીન બાર તેમ જ પ્રોટીન બિસ્કિટ પણ ઉપલબ્ધ જ છે. જો કે એનો પણ ઉપયોગ મર્યાદિત માત્રામાં કરી શકાય. ઈંડાં એ પ્રોટીનનો સમૃદ્ધ સ્રોત છે. એનો ઉપયોગ પણ નિયમિત રીતે કરી શકાય.