રામદેવના પલટીઆસન સામે સુપ્રીમ કોર્ટનું ક્રોધાસન

યોગ ઉપરાંત આયુર્વેદ અને પ્રાકૃતિક ચિકિત્સાથી ભારે લોકપ્રિય થનારા બાબા રામદેવ અને એમના ‘પતંજલિ ગ્રુપે’ હઠીલા રોગોની ૧૦૦ ટકા સારવાર અંગેના સતત ફેલાવેલા દાવા સામે સર્વોચ્ચ અદાલતે લાલ આંખ કરી છે. જો કે આ વિવાદનાં મૂળિયાં દેખાય છે એના કરતાં જુદાં અને વધારે ઊંડાં છે.

- સમીર પાલેજા

સમાજ ભલે કાયદો ગધેડો હોવાની કે ન્યાયની દેવીને આંધળી ગણવાની રમૂજ કરે, પણ અદાલત હંમેશાં પોતાનાં આંખ, કાન ખુલ્લાં રાખે છે અને એની ઝપટે ચઢનારને ગધેડા જેવા ગણાતા કાયદાથી પણ ધોળે દિવસે તારા દેખાડે છે.

આનો પરચો યોગગુરુ બાબા રામદેવને બરાબર મળી ગયો. એમની સામે ૧૯૫૪ના એક વિચિત્ર કાયદા હેઠળ સુપ્રીમ કોર્ટમાં કેસ ચાલે છે. એમાં બાબાએ પોતાની જીદ, મમત અને મિથ્યા અહંકાર દર્શાવીને પેલા વિવાદાસ્પદ કાયદાની વર્તમાન અપ્રાસંગિકતા કોર્ટમાં પુરવાર કરવાની અમૂલ્ય તક વેડફી નાખી ઉપરાંત સુપ્રીમ કોર્ટના આદેશની અવહેલના કરીને પોતાના જ પગ પર પાણો માર્યો.

ભૂતકાળમાં જઈએ તો ૧૯૫૪માં ઊંટવૈદો અને નીમ હકીમો દ્વારા ભોળા દરદીઓ સાથે કરાતી છેતરપિંડી પર અંકુશ મૂકવા ભારત સરકારે ડ્રગ્સ ઍન્ડ મેજિકલ રેમડીઝ (ઓબ્જેક્શનેબલ ઍર્ટિઝમેન્ટ) ઍક્ટ નામનો કાયદો કરેલો, એ અંતર્ગત અંધાપો, મોતિયો, કૅન્સર, બહેરાશ, પ્રોસ્ટેટની બીમારી, ફીટ, પથરી, ગ્લુકોમા, હૃદયરોગ, બ્લડ પ્રેશર, હિસ્ટેરિયા, ગાંડપણ, કોઢ, મેદસ્વીતા, ન્યુમોનિયા, નપુંસકતા, ટીબી, ટ્યુમર જેવી ૫૪ બીમારીને અનક્યૉરેબલ (સંપૂર્ણ સાજા ન થઈ શકાય એવી) ગણાવી એ મટાડતી જાહેરાતોને પ્રતિબંધિત કરવામાં આવી હતી.

આ કાયદો આજે કોઈને યાદ પણ નહીં હોય અને એટલે જ નૅચરોપથી, યુનાની, આયુર્વેદ કે બીજી ચિકિત્સા પદ્ધતિથી અનેક રોગ સો ટકા સાજા કરવાની લોભામણી જાહેરાતો મિડિયાનાં વિવિધ પ્લૅટફૉર્મ પર છૂટથી જોવા મળે છે. કોઈ જાહેરખબરદાતાને એ કાયદો ક્યારેય નડ્યો નથી. બાબા રામદેવ પણ વર્ષોથી એમના જાહેર કાર્યક્રમોમાં ને ટીવી શોઝમાં બ્લડ પ્રેશર, ડાયાબિટીસ, કૅન્સર, વગેરેના રોગીઓના મોઢે જ બોલાવડાવે છે કે ‘પતંજલિ’ની સારવારથી અસ્થમા,

અમારી બીમારી જડમૂળથી ઠીક થઈ છે.

બાબા આવા પ્રચાર સુધી જ સીમિત રહ્યા હોત તો કોઈએ વાંધો લીધો ન હોત, પણ એમણે એલોપથી, ફાર્મા કંપનીઓ અને એમબીબીએસ ડૉક્ટર્સને સતત વગોવીને ઈન્ડિયન મેડિકલ ઍસોસિયેશન (આઈએમએ) નામની પ્રાઈવેટ તબીબી સંસ્થાને છંછેડી.