ઈનડોર પ્લાન્ટનો તો રુઆબ જ નોખો, હોં...

બાલ્કનીની ગેરહાજરી કે અપૂરતો તડકો જેવી મર્યાદા સાથે પણ ઘરમાં હરિયાળી જોઈતી હોય તો શો પ્લાન્ટનો બગીચો બનાવી દો.

- પૂર્વી શાહ 

મની પ્લાન્ટ, સ્નેક પ્લાન્ટ, પીસ લીલી, સિંગોનિયમ, રબર પ્લાન્ટ, ઍર પ્લાન્ટ, લકી બાંબુ, ફિલાડેન્ડ્રોન, મોન્સ્ટેરા... જેવાં નામ એવું જ આકર્ષક રૂપ. પાછી કદ, આકાર, રંગની અઢળક ચૉઈસ. વેલકમ ટુ ધ વર્લ્ડ ઑફ ઈનડોર પ્લાન્ટ્સ અર્થાત્ શો પ્લાન્ટ્સ. આ બધા પ્લાન્ટ ગ્રીનરીની સાથે ઑક્સિજન તો આપે જ છે, સાથે ઘરને નોખો લુક પણ આપે છે અને ફ્રેશનેસ પણ ફીલ કરાવે છે

પહેલી વાત, આ ઈનડોર પ્લાન્ટ્સ એક જાતના જંગલી પ્લાન્ટ્સ છે, જે ઓછી સનલાઈટમાં સર્વાઈવ કરી લે છે. આ પ્લાન્ટ દુનિયાભરનાં જંગલોમાં ગીચ વનરાજીની વચ્ચે સૂર્યપ્રકાશના અભાવમાં પાંગર્યા અને પછી એમને નર્સરીમાં લાવીને શહેરોમાં પ્રચલિત કરવામાં આવ્યા. એમને સૂર્યપ્રકાશ કે ખાતરનો ઝાઝો ખપ નથી. ખાવામાં એ ઝેરીલા હોય છે એટલે જલદીથી કીડા પણ લાગતા નથી, પણ સાવચેતી માટે બાળકો અને પાળેલાં પ્રાણીથી એ દૂર રાખવા પડે.

મોટા ભાગના ઈનડોર પ્લાન્ટ્સ મિડિયમ કે બ્રાઈટ લાઈટમાં નીખરી ઊઠે છે. બારી અને બાલ્કની કરતાં જ્યાં ઓછો પ્રકાશ હોય, સહેજ ઠંડક હોય એવા કોઈ પણ ખૂણે એમને ગોઠવી શકાય. તદ્દન અંધારું કે હવાની ઓછી અવરજવરની જગ્યા ઈનડોર પ્લાન્ટ્સને પણ પસંદ હોતી નથી. આ પ્લાન્ટ્સ પણ દિવસે ઑક્સિજન અને રાત્રે કાર્બન ડાયોક્સાઈડ છોડતા હોવાથી બેડરૂમમાં હોય તો એમને બેડથી આઘા જ ગોઠવવા.