મોતને વહાલું કરવાના પ્રયાસ નિષ્ફળ ગયા હવે એ બીજા લોકોનાં જીવનમાં પ્રાણ પૂરે છે!

એની આંખમાં કંઈક નોખું કરવાનાં સપનાં હતાં. એ શમણાં તૂટતાં જોઈ એણે આપઘાતના પ્રયાસ કર્યા. મરજી વિરુદ્ધનાં બે લગ્નની નિષ્ફળતાએ એને નાસીપાસ કરી નાખી... પણ અચાનક એનામાં ફરી જીવવાની અને બીજાની જિંદગીમાં નવા રંગ ભરવાની તમન્ના જાગી. અત્યારે એ મેન્ચ્યુએશન અવેરનેસનું કામ કરે છે અને એકલા રહેતા વડીલો સાથે લાગણીભીના સંબંધનો સેતુ બાંધે છે.

- સંગીતા પટેલ

 એ ક કલાકાર તરીકે પચાસથી વધારે ગુજરાતી ટીવીસિરિયલ તથા અનેક કાર્યક્રમોનું ઍન્કરિંગ એણે કર્યું. મોડેલિંગ ક્ષેત્રે પણ ઘણી સિદ્ધિ મેળવી. કેટલીક નાની-મોટી જાહેરાતમાં સુદ્ધાં એ ચમકી. પછી અચાનક એક દિવસ સંગીતાએ નક્કી કર્યું કે હવે ક્યારેય એ રૂપેરી પડદે કામ નહીં કરે...

આ છે અમદાવાદમાં રહેતાં સંગીતા પટેલ.૪૫ વર્ષનાં સંગીતાબહેન આજે ગુજરાતની કપ ગર્લ તરીકે ઓળખાય છે. દીકરીને આપો પાંખ ઝુંબેશનાં પ્રણેતા અને કલાસૂર્ય ફાઉન્ડેશનનાં સ્થાપક સંગીતાએ આજે અનેક દીકરી અને વડીલોનું જીવન સંગીતમય બનાવ્યું છે. જો કે એમના સદાય મુસ્કુરાતા ચહેરા પાછળ ક્યાંક વેદનાની નદી પણ વહેતી હતી.

વિસનગર તાલુકાનાં અંબાબહેન અને પુરષોત્તમદાસ પટેલને ત્યાં બે પુત્ર પછી સંગીતાનો જન્મ. ખેડૂતપરિવારમાં ખુશીની લહેર આવી ગઈ. સંગીતા પિતાની ખૂબ લાડકી. સેવાભાવી પિતાની આંગળી પકડી સંગીતા બધે જતી. પિતા જેકરે એ બધું ધ્યાનથી જોતી અને કહેતી પણ ખરીઃ પપ્પા, હું પણ મોટી થઈને તમારી જેમ લોકોની સેવા કરીશ... પિતા પણ નાનકડી દીકરીની કાલીઘેલી વાતો સાંભળી ખુશ થાય.

કરમની કઠણાઈ કહો કે વિધિના લેખ, સપનાના વિશ્વમાં રહેતી સંગીતાએ ૧૧ વર્ષની નાની ઉંમરે પિતાની છત્રછાયા ગુમાવી. પિતાની ઓચિંતી વિદાયથી સંગીતાના માથેથીઆભ અને પગ તળિયેથી જમીન ખસી ગઈ.

પિતા વગરનું વિશ્વ જાણે એના વિચારમાં બેસતું નહોતું, પણ કરવું શું? મા અને મોટા ભાઈ, બધાં પોતાની વેદના વહેંચીને બેઠાં હતાં. એ વખતે સંગીતાને એમ લાગવા માંડ્યું કે મારું તો હવે કોઈ છે જ નહીં. હવે પરિવાર અને સંગીતા વચ્ચેનું મનોમંથન શરૂ થયું.સંગીતા એક અચ્છી ડાન્સર હતી.સ્કૂલમાં નૃત્ય-નાટકમાં ભાગ લેતી. જો કે પરિવારને એ ગમતું નહીંઃ છોકરીએ વળી નાચવાનું કેવું? ઘરનાં કામકાજ શીખો, એ જ કામમાં આવશે...